O lea ua mautū atu i le Atua pulepule tetele la tatou faafetai na molia e le Ta’ita’i o
le Sauniga lau susuga Kerisimasi Okesene. O lea ua pati ta’oto ai nei le Feepo, aua
ua faataunuuina ma le manuia le faamoemoe sa Lupe, o le la’au lea o le soifua.
Ae ua Talaga pausi le aso, aua ua liligo Tua’au ma Fuamalu. Ua tigi pā’ō nei le uto
aua ua paia le malaefono i Faletagaloa, aua le Afio mai o Toomata, Afio mai le
Aloalii, Afifio ai Tapaau ma le Gafa, ae pola puipui e Safune ma Taulauniu.
Liua le Vai o Sina i lenei itu, O lea foi ua afifio atu Minisita o le Kapeneta, Minisita
Lagolago ma Faipule o le Fono Faitulafono. Afifio foi Faauluuluga o Matagaluega
ma Faalapotopotoga Tumaoti a lo tatou Mālō, ma sui o le kamupani sa fausia le
auala ma le mamalu i le au valaaulia.
O pa’ia ma mamalu na ua taualoa ai le tatalaina o le galuega ua mae’a nei i lo outou
afioaga.
TALA O LE GALUEGA
O le auala lenei o Vaisala e agai atu i faatoaga ma fanua i uta ua avea nei ma
toomaga o le nuu mo fuafuaga mamao ia soona maua pea taumafa ma ia tapena ai i
taimi e tetele ai le faama'i ua aafia ai le lalolagi, e aofia ai ma si o tatou atunu'u.
O le umi atoa o le auala e 2 kilomita. O lona lautele e 5 mita. O le lautele ua
faatāina e 4 mita.
O le tau na fausia ai e le Sakalafai Construction lenei galuega e $670,728.30 ma o le
ofo aupito i maualalo foi lea na manumalo i tauofoga faalaua’itele a le Mālō sa
faatinoina.
FAAPOGAI O LE GALUEGA
E lē gata o le talosaga a le Afioaga na tauala mai ile latou Sui Faipule, ae o lo’o ō
gatasi foi ma le manulauti a le Mālō mo afioaga ua tala i uta ma nofomau ai mo le
atina’eina o faatoaga. Tasi lea auala taua e fesaosoani i le siitia o le tatou
tamaoaiga, aua a lelei auala, maua le eletise ma le vai, o le lelei foi lea o feoaiga ma
unaia vave ai tagata e galulue ma saili manuia o lo’o tanumia i o tatou laufanua.
UPU FAAMĀLŌ
E ia te a’u le agaga fiafia ou te momoli atu ai le fa’amālō a le Mālō i le pule
faamalumalu a Alii ma Faipule o lo tou afioaga a o faagasolo le fausiaina o lenei
auala.
Faamālō atu foi i le konekarate a Sakalafai mo le faatinoina o le galuega i luga o fua
faainisinia ma taiala sa fausia ai lenei galuega.
Momoli atu foi le faafetai i le Pulega o Felauaiga i le Laueleele mo le vaaia ma
faatonutonuina o le galuega a'o faatinoina.
UPU FAAI’U
E ui ina utiuti tupe a lo tatou Mālō mo le anoanoai o galuega fuafuaina, o lo’o
faalagolago pea le Malo i lana faasoasoa fuafua tatau ina ia faasalafa atu i tafa uma
o Samoa tulaga mo le soifua manuia o ona tagata.
Tau ina auomanū itula o totoe o lenei aso i le alofa o le Atua o lo’o tuliloaina ai pea
lo tou soifua ma so matou ola.
Ia soifua ma ia manuia.