Ua maea momoli lapalapa o malo i le faapolo ma le faasagi e ta’ui ai lo tatou va
tapuia ma lo tatou Tapaau i le lagi, tau ia o se foe faae’e i le tau so tatou vaivai,
ae faamoemoe mea uma i le Agalelei o lo tatou Tapaau Sili. E faafetai ai i le taitai
o le sauniga lau susuga Setu Pitone, mo le upu o le Tala Lelei lenei aso, faafetai
tapena, malo Tatalo, ia faamanuia pea le Atua mo lou valaauina i le galuega.
Liliu ane ia lea matua talaga, ua afifio foi le paia o le Malo i afioga i Minisita o le
Kapeneta, o Minisita Lagolago ma Faipule o le Palemene.
Susu foi Faauluuluga o Matagaluega ma Faalapotopotoga Tumaoti a le Malo.
Tainane Samoa ua potopoto.
O paia ma mamalu na ua agatonu ai lo tatou taeao fesilasilafai.
TALA O LE GALUEGA
O le auala lenei sa fesoasoani ma faatinoina mai galuega Fa’apa’aga a le tatou
Malo o Samoa ma le Faletupe o le Lalolagi i ana polokalame (Pilot Program
Climate Resiliance-PPCR). Sa faatino tauofoga faalaua’itele masani a le Malo
ma manumalo ai le kamupani a le Sakalafai Construction i le tauofo aupito
maualalo e $730,335.00 mo le faatinoina.
Umi – 1.5kilomita
Lautele – 6m
Lautele faataina – 4m
FOLASAGA LAUTELE
O galuega fa’aauau faifaipea lenei a le Malo o loo faagasolo pea ina ia mautinoa
le lelei pea o auala tetele ma auala galue mo afioaga taitasi, o le ala foi lena ua
lautasia ai lenei vaega o le auala i le faasoa Faapa’aga a le Malo ma le Faletupe
o le Lalolagi, ona o le toatele o le mamalu o le atunuu o loo alala ma aumau ai.
E le po se silafia o loo feagai pea le lalolagi ma le faamai o le koviti-19, peitai e le
o mafai ai lava ona tuua galuega ua uma ona fuafua e le malo ina ia faigofie ma
saogalemu femalagaina i auala tetele aua le soifua manuia o ona tagata, ma o le
a vave ai foi ona siitia atinae tau tamaoaiga e le gata i le laueleele faapea le
gataifale.
O lea ua ma’ea le galuega pei ona outou talosaga mai ai, ae ao foi ona lafo sa
outou ma’a aua le saga teuteu ma faaleleia i taimi uma ina ia umi ona lelei lenei
auala.
UPU FAAI’U
E toe momoli atu le faafetai ma le faamalo i le Kamupani a le Sakalafai
Construction mo le faatinoina o lenei galuega tele i fua faainisinia ma aiaiga sa
fuafuaina mo le fausiaina.
Momoli foi le faafetai i le Minisita o Galuega ma Atina’e Tetele, Komiti Faatonu
ma le Pulega o Fealauaiga i le Laueleele mo le vaaia ma mata-i-tu lelei o
galuega a’o fausia i ona vaega uma i aiaiga ma fua faainisinia.
Ia auomanū lenei aso i le alofa o le Atua pulepule tetele.
Soifua.