Ua tini pao nei le uto e pei o le Faiva i Tapalega, ina ua Togi Pa tau I le ‘Ave lo
tatou Faamoemoe ma le Talelei a le Alii, e pei ona saunoa i ai le susuga i le
Fesoasoani ia Patelesio Siilima , e momoli le faamanu ma le faafetai i le Atua
Pulepule Tetele aua o le faamoemoe ua taunuu o le Laau o le Soifua lea.

Ae ou te le’i laasia la le vai o le Tama nai Mulinuu ma Saipolata’emo, e muamua
ona ou faatulou atu i le Afifio ai le To'aono o Alii o le Faga, Afifio Taulagi, o
Toleafoa ma Vaafusu’aga) Alalata'i le To'afa ma Tagata Matutua faapea le
Falea'ana ma Salemuliaga.

Ua fesaga’i sega’ula ae o se ta’otoga o I’a Sa, aua o lea ua afifio Minisita o le
Kapeneta ma Minisita Lagolago, afifio foi Sui o le Palemene tainane Ulu o

Matagaluega ma Faalapotopotoga Tumaoti a lo tatou Malo, faapea le maave eseese
o le auvalaaulia.
Malo le soifua, malo foi le Lagi Mama.

TALA O LE GALUEGA
Ua mae’a tauofoga faalaua’itele masani a le Malō, ma manumalo ai le tauofo
aupito i maualalo le kamupani a le TM Transport Ltd i le tau e $370,672.83 ma o
latou faatinoina ai loa le fausiaina o lenei auala.

 E 1.6 kilomita le umi o le auala
 E 6mita le lautele
 Ae 5mita le lautele sa Faataina

O lo’o faaauau pea galuega faaleleia mo auala Tetele ae maise o auala galue mo
nuu ma afioaga i Upolu faapea le tatou motu i Savaii nei. E ui ina lutia le laolagi i
le malomaloa o le Faamai-oti, ae ua le tuua ai le pito laau a le malo, e faaleleia ma
fausia auala o femalagaina, ia faafaigofie ma saogalemu femalagaina a le atunuu.
E talitonu le taofi o lea ua to atu so outou matu palapala mai le Malo e tauala atu i
lenei auala, ae moomia le fesoasoani a lo tatou nuu mo le tausiga faifaipea o le
auala ina ia fatumauina lona lelei e pei ona i ai nei.

UPU FAAI’U
E faafetai i le taulagalaga a lo outou Sui Faipule ma tu’itu’i atu pea i le Malo,
faatasi ma le pule mamalu a Alii ma Faipule, o lo’o lagolagosua.

E toe faaleo le agaga faafetai i le Kamupani a le TM Transport Ltd mo le galuega
ua mae’a ona faatinoina i se tulaga maualuga.

E le faagaloina le faafetai i le Afioga i le Minisita o Galuega Tetele, faapea le
Pulega o ma le Aufaigaluega a le LTA mo le mata-i-tuina o galuega faatino a'o
fausia lenei auala matagofie.

Ia faamamalu ‘Aao agalelei o le Atua i le mamalu o e atunuu o le a faaaogaina
lenei auala, ma ia manuia tele le aofia ua auai mai lenei faatasiga.

Soifua.