Susu lau susuga a le Taitai o le sauniga,
Afifio Minisita o le Kapeneta;
Afioga i Faipule;
Afifio foi le auvalaaulia i ona tulaga faalupea.
E faapai atu foi i paia o le afioaga nei.
Susu o alo o Malietoa;
Susu mai Usoalii;
Afio mai Taimalelagi ma Tapaau
Alalatai ‘Ati ma Lautolo.

O lea ua mae’a ona momoli lapalapa o Malo, i le faasagi ma le faapolo e tatau
i le Atua, o le faapogai o manuia uma o loo o tatou folau faatasi ai ma le
faatuatua. O le a taoto pea la i mauga o ao paia ma mamalu o lenei aso, e le
toe autalaina, o le i’a foi mai moana ua uma lava ona āisa.
O le faamamafa a le Malo i lana manulauti, ia manuia ma puipuia Samoa, ia
manuia nuu ma afioaga, ma ia gafataulimaina a tatou lava atina’e, e tu’uitiitia
ai lo tatou faalagolago tele, i oloa gaosi mai i fafo. O le lavatia ma le maua pea
o taumafa, o se tulaga maualuga i taumafaiga a le tatou Malo, aemaise o le maua

2

o avanoa faigaluega, e tapu’e ai pea le tomai, o le agava’a ma taumafaiga uma
e lagolago ai le atinae o nuu ma afioaga o Samoa. A matau foi i le lalolagi – e
17 taunuuga mo’omia tele, o lo’o tuliloa i le isi 6 tausaga o lumanai ma o lo’o
aofia ai le aveesea o le mativa i le lalolagi, o le maua o avanoa faigaluega aloaia,
ma le taofia o le galala i le lē maua o taumafa.
O le o’o mai o le Koviti 19 i Samoa, e le gata sa matua oia ai lo tatou tamaoaiga,
ae na manino ai le taua tele o lo tatou fa’amoemoe ia i tatou lava i a tatou
tapenaga e tali atu i a’afiaga o le fa’amai, ma le maua pea o oloa gaosi mo
atina’e ma le taumafa i aso uma. Na matauina le siitia maualuga o le tau o oloa
tu’uaisa, e aofia ai ma le moa, aemaise lava ina ua tu’uitiitia vaa e femalagaai,
ma le faitau aofai o oloa na mafai ona maua, e fa’atauina mai e le aufaipisinisi.
O lenei aso, o lea ua tatou molimauina, le tali e mafai ai ona o tatou gafatia nisi
o luitau e aliae mai i le lumanai, ona o ni fa’amai ma ni fa’alavelave faafuasei i
le lalolagi, e ono a’afia ai le maua pea o taumafa. O lea, e fa’amalo atu ai i le
Pule ma le Pulega o le Frankie Group ma le Sunshine Pacific Ltd, ona o lo outou
saili malo, ua afua ai lenei atina’e tele. O le matau atu, e le o se atina’e taugofie.
Ua le gata la i le maua pea o taumafa, ae o le a avea foi lenei atina’e, ma afuaga
o le maua o galuega, aemaise mo i latou uma i le Itumalo o Aiga i le Tai,
Falelatai ma Aana o loo tau lalata mai i lenei nofoaga. O loo iai le fuafuaga a
le Kamupani, e galulue fa’atasi foi ma tatou Fono Faavae o Itumalo latalata mai,
ina ia maua pea avanoa e fa’asafua atu ai fa’amanuiaga o lenei atinae, i aiga,
nu’u ma afioga. Mulimuli ane, e iai le talitonuga, o le a avea Samoa ma se isi
atunu’u e latou te fa’atauina atu le moa lelei, taugofie, aulelei ma tino lelei, i
Amerika Samoa, Tonga ma Fiti ma isi atunu’u o le lalolagi.
O lenei atina’e, o le a le gata e aoga mo tatou lava tagata i aso uma, ae o le a
fa’aauau pea i le lumana’i. O le a tele sona taua, fa’atasi ma isi atina’e o loo

3

faatautaia e le Frankie Group ma le Sunshine Pacific Ltd, i a tatou taligamalo e
pei o le Fonotaga a Taitai o Malo o le Taupulega i le 2024, ma nisi fonotaga e
faia mai i Samoa i le lumana’i.
O le lu’itau la a le Malo i isi pisinisi ma atinae o i Samoa nei, ia avea le
fa’amoemoe ua o tatou molimauina nei, e fai ma afuaga o lo outou silasila foi,
i atina’e ma pisinisi tetele fa’apenei, e faia lava i o tatou laufanua, ma manuia
ai lo tatou atunu’u ma ona tagata.
Ia afe mai se fa’amatalaga. Le pulega ma le aufaigaluega a le Sunshine Pacific
Ltd, saga’i ane ai o le tai. Ia fa’amanuia le Atua i le amataga o lenei atinae ma
ia fa’aauau e le gata i le nofoaga e gaosia ai mea taumafa, ae o isi foi atinae i
togalaau aina ma fale fuamoa e pei ona matauina i Tanumalala.
Le afioaga ma le Itumalo, o le malu puipuia ma le fa’aauauina, o le
gafataulimaina ma le ‘ausia o ona taunuuga moomia, e taoto atu i la outou
fa’atofalaiga. E iai le talitonuga, o le a le muta ai iinei, le fa’aopoopoina o nisi
atinae tetele fa’apenei, mo le manuia o Samoa.
Ia manuia tele le auvalaaulia.
Soifua ma ia Manuia