Tali manino le Minisitā o le Matāgaluega o Ta’aloga ma Alagā’oa mo le Soifua Fiafia o Tagata iā
Laumatiamanu Ringo Purcell e tusa o le finagalo fa’aālia o oe Ta’ita’ifono o le Lakapi Samoa iā
Tuila’epa Lupesoli’ai Dr. Sa’ilele Malielegaoi ua fa’alauaitele i le leai ose fesoasoani a le malo I
le faamoemoe o le Manu Samoa mo lana malaga taamilo (tour) o Europa i le masina o Novema.
(O nisi mataupu sa fa’alauiloa e le Minisita i tiute tauave ma manulauti o lenei Matagluega fou a
le Malo o le faalauiloa atu i le polokalame ‘O oe ma lou malo’ e faasasalauina i le aso Faraile 16
Aukuso 2024.)

(LAUMATIAMANU)- O le mea moni lava ia, tatou te masani lava i le malaga ta’amilo (tour)
lea a le Manu Samoa 15 i le Atu Europa i fa’ai’uga o tausaga ta’itasi, o lona uiga, e le’o se
fa’amoemoe fa’atoā iloa nei, po’o ananafi, po’o le tausaga ua mavae, leai, o le polokalame o ia
malaga ta’amilo mo au fa’avāomālō uma a le lalolagi, pe tusa ma le 12 masina ua ta’oto mai le
kalena o ta’aloga mo ia malaga ta’amilo ta’itasi.
Mo le silafia, e le’i aumaia lava se talosaga a le Lakapi Samoa fa’apitoa mo le malaga ta’amilo
lea a le Manu Samoa 15.
Sa aumai la latou talosaga iā Aperila, ae sa talosaga mai e avatu atoa le $1.5 Miliona auā le
fa’agasologa o fuafuaga ma fa’amoemoega a le Lakapi Samoa, peita’i e aumai ua fa’ai’ui’u le

Tausaga Fa’aletupe 2023 – 2024, ma o lo’o tau fa’asoasoa seleni o lo’o totoe mai lea paketi i
fuafuaga o lo’o mo’omia ona ‘ave i ai le fa’amuamua a le Mālō i lenā taimi.
E aumai la latou talosaga o lo’o ta’atia fo’i le talosaga a le ‘Au Ta’a’alo a Samoa mo Ta’aloga o
le Pasefika lea fo’i sa ‘ave i ai le isi $500,000 e malaga atu ai le ‘Au Ta’a’alo a Samoa i ta’aloga
o le Pasefika, ma e le’i taliaina la latou talosaga ona i lenā taimi e le’o toe mamao mae’a le
Tausaga Fa’aletupe 2023 – 2024 iā Iuni 2024, fa’aopoopo i ai ma le fuafuaga a le Mālō i lana
fesoasoani mo le ‘Au Masi’i a Samoa i Ta’aloga Fa’avāomālō a le Olimipeka i Farani.
Ma e le’i taliaina la latou talosaga sa tu’uina mai i totonu o le Tausaga Fa’aletupe mai 2023 –
2024 lea ua mae’a atu, peita’i e $600,000 sa ‘ave i ai e malaga atu ai le tatou ‘au i le ta’amilosaga
o le Ipu o le Lalolagi (World Cup) lea sa fa’atautaia iā Oketopa a’o Novema ai ta’aloga o le
Pasefika lea na talimālō ai Solomona.
O la’u tilotilo i ai, o lea ua fa’aāli mai nei i le atunu’u o lea ua leai se tupe e tapena ai fuafuaga
mamao a le Manu Samoa 15 mo lana malaga ta’amilo masani i fa’ai’uga o tausaga, ona pei ai
lea, e foliga mai ua leaga le Mālō, ina ua leai se fesoasoani atu.
Ae mo le manino i le silafia e Samoa, e leai se talosaga aloā’ia ua tu’uina mai e le Lakapi Samoa
e tusa o lea fuafuaga, i totonu o le Tausaga Fa’aletupe Fou lenei ua amatalia, 2024 – 2025.