O Lenei Fa’aaliga Faalauaitele e tali atu ai i tusitusiga i le Samoa Observer i le Aso Sa 17
Ianuari, faaulutalaina “Another resignation adds to A.G. Office turmoil”, ma le Aso Lua, 19
Ianuari 2021, faaulutalaina “Resignation “attitude problems”: AG”.
O nei tusitusiga e pei ona taua, e sesē ma e tatau ona logopuialii le mamalu o le Atunuu, ma
fa’ailoa le moni o nei tusitusiga o le ute lea o lenei fa’aaliga fa’alauaitele. O nei foi tusitusiga
sesē e atagia ai le tulaga ua iai nei tusitusiga ale Samoa Observer.
Muamua, e lē o’i latou uma sa fa’ailoa o latou suafa i le tusitusiga i le Aso Sa o ni loia e
fa’atautaia moliaga fa’asolitulafono (prosecutors). Mai le to’asefulu sa lisiina o latou suafa, e
na’o le to’a tolu (3) e gafa ma le fa’atautaia o moliaga fa’asolitulafono (prosecutors). O isi o loia
sa fa’ailoa atu o latou suafa sa galulue i isi vaega o lo’u Ofisa, a o nisi sa galulue faa-vaitaimi e
fesoasoani i galuega fa’aloia, e aofia ai galuega o le faatautaia o moliaga fa’asolitulafono.
Lua, e lē o’i latou uma e toasefulu (10) na tā’ua e le Samoa Observer suafa o tagata na
fa’amavae. O nisi sa galulue faa-vaitaimi ma ua mae’a le taimi o a latou auaunaga i le Ofisa, ma
sa leai fo’i se naunautaiga e toe fa’aauau le auaunaga i le Ofisa ona o nisi tulaga e lē alofia, e
aofia ai le faaauauina o aoaoga, poo tuatuagia faaleaiga. O mafuaaga ia na tuuina mai i lo’u
Ofisa.
Mulimuli, o loia to’atolu (3) sa faatautaia moliaga fa’asolitulafono e pei ona lisiina mai e le
Samoa Observer, na fa’amavae e ala ile tuuina mai o a latou tusi faamavae ma sa ‘ou taliaina a
latou faamavaega e tusa ai ma mafuaaga na tuuina mai ia latou tusi faamavae. E pei ona ou taua i
le imeli na tali atu ai i le Samoa Observer, o le fa’amavae o tagata faigaluega o se aga masani i
so’o se fale faigaluega.
E taua le faamanino o le tulaga lenei – O tusi faamavae uma sa tuuina mai i lou Ofisa, e leai se
tusi sa faapea mai ua mafua ona faamavae ona o le tofiga lea ua ou iai nei, pe lē fiafia foi i
au faaiuga fai. O le toatele o i latou o lo’o tā’ua, na faamavae e tauaveina tofiga fou i Ofisa Loia
tumaoti (private practice), po o nisi Matagaluega po o Ofisa a le Malo, faapea fo’i o tuatuagia
fa’aleaiga e pei o le tausiaina o mātua.
E foliga mai o lē na faia nei faamatalaga i le Samoa Observer, ua suia mafuaaga na faamavae nisi
o le aufaigaluega. A o le sui fo’i o le mafaufau i le tulaga o mafuaaga na faamavae ai mai le
Ofisa e aunoa ma le faailoa mai poo le susu mai foi e feiloai ma lenei Ofisa, i lou manatu, e

atagia mai ai le amio ma le aoaiga a lē na faia le faamatalaga i le Samoa Observer, ae lē’ o le
Ofisa nei. E foliga mai ua faamavae i mafuaaga e ese mai i a latou tusi faamavae, ona ō lea
tauai maa mai.
E ao lava ona toe faamamafa lenei tulaga – e lē avea ni uiga fe’oe’oea’i a se to’aititi e noatia ai
galuega a le Ofisa lenei, ma e lē māmā foi se tuuaiga e fa’asaga i le Ofisa nei e ala mai i lipoti po
o ni tusitusiga lē fa’avaea mai le Samoa Observer: a faapea e lē mafai e le Samoa Observer ona
faamautinoa le numera o loia e fa’atautaia moliaga fa’asolitulafono na faamavae mai i lenei
Ofisa e ese mai i isi aufaigaluega poo loia o lenei Ofisa – e faapefea la ona iai se talitonuga ma se
faamoemoe o tagata lautele i le Samoa Observer latou te faataunuuina ma faatumauina o latou
tiute faavae faa-tusitala i se tulaga e talafeagai. O tulaga tatau ai ma taiala faavae masani o
galuega faatusitala o le faatino o tiute i se tulaga tonu ma le lē faa’ituau, po o le lē faasalalauina o
mataupu tau lotoifale e patino i le tagata (privacy), ma le puipuiina o faamaumauga e tapu
faaletulafono ona faalauaiteleina (confidentiality).
Masalo e tatau ai i le Samoa Observer ona taga’i toto’a i le faamautinoaina muamua o le sa’o ma
le atoaatoa o a latou faamaumauga, po o le faamautinoa fo’i po o ni mafuaaga lelei ma le tatau ua
faailoa atu ai e i latou ia e avatua faamatalaga i le Samoa Observer, nai loo le tele vave e lolomi a
latou tusitusiga ae mulimuliane maua – e sesē.
O lenei fa’aaliga ua tusiaina i lona tulaga faalauaitele, ma e lē o auiliili atu faamaumauga e
faatatau i tagata ta’itasi o le aufaigaluega ua tuua lenei ofisa ona o le faaeteete ina nei aafia
le ta’uleleia o tagata faigaluega a lenei Ofisa ua tō’esea, faapea ē o loo faigaluega pea: o le
tauleleia o tagata faigaluega o se tulaga e lē i amanaia i tusitusiga a le Samoa Observer ina
ua latou faalauiloaina suafa o ē ua faamavae mai lenei Ofisa. Ae e malamalama lenei Ofisa
i le tulaga lea, aua o le lē amanaia o aafiaga o tusitusiga i tagata, o se faiga ua masani ai le
Samoa Observer. Ua lava a le faitau o le tele o faasa’oga po o le aveese fo’i o nisi tusitusiga
mai i le Samoa Observer, e faamautu ai se mau – o lena tulaga o se faiga masani a lea
nusipepa.
O le galuega a le Ofisa o le Loia Sili o le galuega fa’ale Faavae, e faatino e tusa ma aiaiga o le
Faavae o le Malo o Samoa ma o se auaunaga e tautua ai mo le atunuu lautele e ala lea i galuega
faa-loia mo le Malo o Samoa. E faaauau pea le galuega a lenei Ofisa pe a manaomia pea e le
Malo auaunaga faa-loia, ma e lē tu’ua pe a faamavae mai se isi o le aufaigaluega.