JULY 21, 2020 AT 4-6PM, TATTE CONVENTION CENTRE

Faafetai tele i lau Susuga i le Faafeagaiga Maauga
Motu, mo le tatou talosaga molia o lenei afiafi.
Fa’atalofa atu i le paia ma le mamalu ua aofia, ona o
lenei fa’amoemoe taua. E fa’afeiloai atu fo’i i Sui o le
Kapeneta ma le Palemene, ae fa’apea fa’auluuluga o
Matagaluega ma tatou pa’aga mai fafo o lo’o fa’atasi
mai. E manatu o le a le toe o’o se fa’amatalaga i
mamalu faalupe o lenei afiafi, aua o paia ua taoto a’o
se ala o’o.
O le National ID po’o le Pepa Fa’amaonia mo tagata
Samoa uma, o se atina’e ua au tausagā ona
fa’atalanoaina ma fuafuaina e le tatou Malō, ona o le
tele o fa’afitauli sa tula’i mai i fa’amaumauga o Pepa
Fanau, ae fa’apea fo’i ma Tusifolau. O le masina o Mati
i le 2017, sa pasiaina ai loa e le Kapeneta le amataina
o lenei Atina’e, e le Ofisa o Fuainumera Fa’amauina.
Ae ona o le utiuti ma le tau fa’asoasoa o tupe maua, sa lē mafai ai lava ona fa’atino lenei atina’e i se
tulaga mautū.
Peita’i, ina ua maua tupe fa’asao (savings) pe tusa ma le $4 milliona tala Amerika mai le atina’e o
Feso’otaiga Televavave (Samoa Connectivity Project) lea sa fa’atupeina e le Faletupe o le Lalolagi, ma
fa’atauina ai le Tui Cable, o i tonu lea na maua ai le avanoa e le Matagaluega o Tupe i le 2018, e ave ai
le talosaga i le Faletupe o le Lalolagi, ina ia fa’aaogaina nei tupe fa’asao, e fa’atinoina ai loa lenei atina’e,
ua leva ona fuafuaina.
Sa faia muamua se iloiloga e le Fale Tupe o le Lalolagi i le 2018, ma taliaina ai loa le talosaga a Samoa.
O se tulaga e fa’afetaia ai le Faletupe o le Lalolagi, ona o se atina’e e taugatā tele lona fa’atinoina. Na

2
amata mai i lea iloiloga a le Faletupe ona toe lalaga fa’atalanoaga e Matagaluega o le Malō, i auaunaga
eseese, e mafai ona fa’aleleia atili pe afai ae faa’atinoina lenei Atina’e fou.
O le amataga o le 2019, na tu’uina atu ai loa e le Ofisa o Fuainumera Fa’amauina le fautuaga i le
Kapeneta, ina ia amata le Atina’e o le National ID, e fa’aaogaina ai seleni mai le Faletupe o le Lalolagi. O
lea fautuaga, sa talia lelei ma pasiaina ai e le Kapeneta ia Iulai 2019, ma amata ai loa ona fa’atulai le
Komiti Fa’afoe o le National ID, e fa’ataoto fuafuaga, aemaise o le sailiina o ni kamupani e iai tomai
fa’apitoa e fausia ai Pepa Fa’amaonia mo tagata uma.
O le fesili e tupu pea, aiseā lava ua fa’ataūa ai e le Malō lenei atina’e o le National ID?
E tolu nai Vaega tetele ua fa’ataūa, o le a fa’amanino atili mulimuli ane:
Vaega muamua: Ia si’itia le fa’atinoga o auaunaga, i so’o se Matagaluega ma fa’alapotopotoga a le Malō,
ina ia manuia tagata lautele.
Vaega lua: Ia agava’a tagata uma i le auaunaga o le National ID, ma le
Vaega tolu: Ia fausia atina’e tetele e faatupu ai avanoa faigaluega, aemaise o le fa’ateleina o pisinisi e
fa’atupulaia ai pea le tamaoaiga o le atunu’u atoa
O le Vaega taūa muamua, e mafai ona toe fesili faapea:
1. E fa’apefea ona si’itia ma fa’aleleia auaunaga i lenei atina’e o Pepa Fa’amaonia mo tagata uma, po’o
le National ID?
Ua maitauina ma le toto’a, o nisi o matagaluega a le Malō, o lo’o fa’aalu le tele o seleni i tausaga ta’itasi,
ina ia tausia ma fa’aleleia ai a latou ID systems, po’o sisitema ID, po’o polokalame komipiuta mo le
fa’amaoniaga o tagata, e pei o le: Vaega o Tusifolau, Vaega o Laisene Ave Ta’avale, ID mo aoga, ID mo
le Penisione, ma le tele o isi ituaiga ID, o lo’o faia lava e matagaluega ina ia faamaonia ai tagata e
faaaogaina a latou auaunaga.
O le mea moni, e tasi lava le fa’amoemoega o nei sisitema uma (ID systems), ia mafai ona fa’amaonia le
tagata, o lo’o fa’atinoina pe fa’aaogaina se auaunaga. A fua lā i le tele o tupe a le Malō e fa’aalu i
tausaga uma mo nei sisitema ID, ua matuā atagia ai le tele o tupe fa’aalu e Matagaluega i lenei lava
galuega e tasi o le ID.
Peita’i, e mafai ona suia lenei faiga ina ia fa’asaoina nei mau seleni, pe afai ae faatūina lava se Vaega
Fa’apitoa e le Malō, e gafa taulimaina le fausiaina o se Pepa Fa’amaonia se tasi (unique ID), e laugatasia
uma ai Matagaluega ma so’o se Fa’alapotopotoga, aemaise o so’o se tagata e mana’omia le ID.

3
Mai fa’atalanoaga a Matagaluega, na maua ai, o se tasi o fa’afitauli ua eseese ai ID o tagata, ona e le’o
ia i se Ta’iala e laugatasia uma ai Matagaluega i le fausiaina o latou ID. O nisi e fa’aaogā fa’amaumauga
o Pepa Fanau, o nisi e fa’aaogā Tusi Pasi o aoga, ae o nisi fo’i, e fa’aaogā suafa matai, po’o igoa e fiafia
tagata e tu’u i latou ID.
E lē gata ina leai se Ta’iala e fausia ai Pepa Fa’amaonia, ae o le Samoa lava ia ma lana tu masani, e tele
suafa e agava’a i ai. E lē gata o le suafa aloaia i le Pepa Fanau, o le mau suafa matai ua faae’e i ai, ae
ua fa’apea fo’i ona fa’aaogā suafa papatiso ma igoa tauvalaau i aiga, e iloa ai.
O le tatou atunu’u fo’i, e tu’usa’oloto lava le suafa e te fa’ai’u i ai po’o le surname. O lona uiga, e mafai
ona e fa’aiu i le igoa muamua o lou tamā, po’o le igoa matai o lou tamā, po’o le suafa o le tamā o lou
tamā, pe e te fa’aaogaina foi se fa’aiu to’atele pei o Smith, ia pe fa’ai’u fo’i i le to’alua, pe afai ua
fa’aipoipo. O nei mau faai’u eseese, ua faigatā tele ai ona tutusa ID o se tagata Samoa se to’atasi, ma
ua faigatā ai foi ona feso’otai nei sisitema eseese. O se fa’afitauli tele lea o lo’o tulai mai pea i le
Matagaluega o Aoga, Matagaluega o Falema’i, Ofisa o Faiga Palota, Matagaluega o Leoleo ma
Falepuipui, Matagaluega o Fa’amasinoga, o le SNPF ma le ACC, ma le tele lava o isi auaunaga.
O le eseese o suafa ma fa’ai’u e fa’aaogaina e tagata, o le telē foi lea o le avanoa e sao ai ma
soligatulafono e pei o le tau fa’asese ma le ave fa’agaoi o mea totino a isi tagata.
A’o tatou feagai pea ma lu’itau o le Fa’ama’i o le Koviti-19 i lenei vaitau, tatou te toe to manatu i o tatou
tuaā sa maliliu i le Fa’amai o le 1918. O se tasi o lu’itau tele i lenā vaitau, o le leai lea oni fa’amaumauga
maumautūtū, e fa’amaonia ai o tatou tuaa na maliliu, i lea mala tele. O se tasi lea o aogā sili o le National
ID i le tatou Malō, o le a vave ai ona fa’ailoa tagata ua puapuagatia i taimi o fa’alavelave fa’afuase’i,
aemaise mala fa’a-le-natura ma fa’apea ai fo’i ona fa’atino vave auaunaga fesoasoani.
O nei mau fa’afitauli, ua talitonu le Malō, o le a mafai ona foia pe ā faia se National ID se tasi, mo tagata
uma. O le fa’atūina fo’i o se Vaega fa’apitoa e gafa tonu ma lea auaunaga, o le a fa’asaoina ai le tele o
tupe, fa’asaoina taimi faigaluega, ae e si’itia maualuga ai auaunaga tau i le fa’amaoniaga o tagata.
O le taimi nei, ua tu’uina le amataina o lea atina’e i lalo o le Ofisa o Fuainumera Fa’amauina (Samoa
Bureau of Statistics), ona e feso’otai lelei ma le resitalaina o tagata fananau ma tagata maliliu, ae fa’apea
foi le faitauina o le tatou atunuu, e tauala atu i Tusigaigoa o Tagata ma Fale, e pei ona masani ai.
O le Vaega taua lona lua e mafai ona fesili fa’apea:
2. O ai tagata e agavaa i lea atina’e o le National ID?

4
Ua outou silafia lelei, na’o tagata e malaga i atunu’u i fafo, e agava’a i le Tusi Folau. Ua na’o tagata fo’i e
ave ta’avale, e iai ID ave ta’avale. E fa’apena fo’i i le au penisione, NPF, po’o fanau aoga ua autova’a atu
i le NUS, ia ma isi auaunaga ua faia fa’apitoa ID mo latou tagata faigaluega.
Ae a fa’apefea le lautele o le atunu’u, e le’o lavea i ia vaega ua ta’ua?
O le taimi nei, a fia fai sau tusi tupe, po’o sau nonoga tupe, po’o se atina’e e te tusi talosaga i ai e te fia
auai, ua tapā lava le Pepa Fa’amaonia aloaia. A lafo mai sau seleni mai atunu’u mamao, e tapā lava sou
Pepa Fa’amaonia. Ua le gata i le Pepa Fanau, ae ua mana’omia foi se ID e iai sou ata, ina ia malosi ma
atoatoa le fa’amaumauga, e iloa ai o oe moni lava lea.
Atonu o le tasi lea o fa’afitauli o lo’o taotaomia ai o tatou tagata, e a’afia ai ma tatou tagata e iai a’afiaga
tumau o le tino, po’o manaoga fa’apitoa, mai le faia o ni tusi tupe, aemaise oni tusi talosaga mo atina’e
ma pisinisi laiti, e tausi ai fanau, aiga ma nu’u, ona o le leai o ni Pepa Fa’amaonia aloaia e agava’a ia i.
O se tasi o fa’afitauli ua maitauina foi, ua fa’aaogāina e le tele o pisinisi ma auaunaga eseese, Tusi Folau
na faia fa’apitoa mo faigamalaga i fafo, ae fa’apea fo’i ma ID Ave ta’avale mo le fa’afoeina o ta’avale, e
fa’amaonia ai tagata o lo’o fa’aaogāina a latou auaunaga. E leai fo’i se isi e tio, auā na o le pau lea o
Pepa Fa’amaonia aloaia o lo’o maua i le tatou atunu’u.
O le silasila mamao a le tatou Malō, ua alagatatau ma ua talafeagai le faia loa o lea atina’e tele, ina ia
mafai ona agava’a uma iai so’o se tagata Samoa, aemaise le fesoasoani tele i le au fai pisinisi o lo’o
fa’amoemoe i ai le tamaoaiga. E le gata i lea, ae o se avanoa lelei tele fo’i, e toe iloilo ma silasila toto’a ai
i se faiga e aupito sili ona talafeagai ma lelei, e fa’alaugatasia ai le fa’amauina o suafa ma fa’ai’u o tagata
Samoa, ina ia foia ai le fenumia’i ma le sēsē o fa’amaumauga, aemaise o le puipuia mai faiga fa’a-
solitulafono.
O le Vaega taua lona tolu e mafai ona fesili:
3. E fa’apefea ona maua galuega ma fa’atupulaia le tamaoaiga i lea Atina’e o le National ID?
Ua tatou iloa lelei, e maua nisi tupe se tele i le lumanai, pe a fa’aalu tatau tupe i le taimi nei i Atina’e
tetele ma taūa fa’apenei.

Mo le silafia, o lea ua maua galuega a fanau a Samoa, talu ona amata mai lenei Atina’e i le 2018. E
talitonu le taofi, a’o fa’agasolo vaega eseese o le Atina’e, o le a fa’apenā fo’i ona fa’atupulaia galuega
totogi e manuia ai fanau a Samoa, aemaise o le fa’amanuiaina ai foi ma le au fai pisinisi, i le okaina ma
le fa’atauina o mea faigaluega.

5
Afai fo’i ae tini lenei fa’amoemoe i se tulaga mautū i le lumana’i, e mautinoa fo’i le fa’atupulaia o nisi fo’i
galuega fou mo fanau o loo i’u mai ma a’oa’oga, aemaise o avanoa faigaluega fou mai le au fai pisinisi
ma le tele o fa’alapotopotoga, e saga fa’atupulaia ai le tamaoaiga o le atunu’u.

Peita’i o nei fuafuaga uma, e fa’amoemoe lava i le fesoasoani mai o lo tatou Matai Sili. Auā na’o le tatou
fuafua ma fa’atino galuega, ae ua na’o le Matai Sili, na te silafia le fa’aiuga o nei taumafaiga uma.
O le fesili mulimuli, o ā lu’itau o lenei Atina’e o le National ID?
O le tali pu’upu’u, e tele ma anoanoa’i lu’itau, ma o ia lu’itau uma, o le a fa’atalanoaina i le Fonotaga ua
fa’atulagaina mo le lua aso, o nei, ma taeao i le itula e 4 i le 6 i le afiafi.
Mo le silafia, ua mae’a le Vaega Muamua, sa fa’atinoina ai le Iloiloga muamua o le sisitema o le ID i
Samoa, sa fa’atinoina e le Konesale filifilia mai Norway, i fonotaga i luga o fesootaiga televavave ma
Matagaluega ma Fa’alapopotoga a le Malo, e aofia ai ma le Chamber of Commerce ma le Samoa
Umbrella of NGOs na amata mai ia Me seia o’o mai i le taimi nei.
O le Vaega lona lua la lenei o faatalanoaga, ua valaauina ai tagata lautele, fa’apea ma le au fai pisinisi,
ma so’o se fa’alapotopotoga, e fia malamalama atili i lenei atina’e, ina ia tatou omai e fa’alogologo ma
velo aso fo’i i le tapenaga, ua o’o iai le fa’agasologa o le galuega o le tatou National ID.
Ae sei fai sina Faafetai pu’upu’u i le tatou Konesale i le faa-peretania.
Good evening to your team again,
I acknowledge with much appreciation your great effort in putting together the Inception report, as well as
the webinar for this first two days of public consultations.
While time is very critical for the implementation of this project, with the CoVID-19 overshadowing our
efforts, I wish you will still be able to deliver in the best of your abilities the benefits and challenges of this
Project in these two days for our people to understand fully the main purpose and outcome of this project.
I wish you well in these two days of deliberations.
Soifua ma ia manuia.