O lea ua mae’a ona mua mea i Matā’utu Sā ma tapui sā o lo tatou Vā Tapuia ma lo tatou
Māta’isau Sili o le Foafoaga, lea na fa’afua i alitimoana, o galu tu-i-moana ma puao to’a tu
tafa’ilagi e pei na manavaina e lana auauna.
E talitonu o lea ua fa’ae’e i lumāfale ma fata i paepae sā o Maota o Samoa, pāia fa’aufigatā ma
mamalu o lenei taeao. E ui lava i fitā o le ala i Tapamala ina ua sala mulifata ma fulisia
augutuva’a i la tatou folauga ona o a’afiaga o le fa’ama’i Koviti – 19, ae fa’afetai o lo’o malutia
pea lo outou soifua ma lo matou ola i le alofa o lo tatou Atua.
Lau Susuga i le Ta’ita’i o le Sauniga, Rev. Komisi Samuelu, afifio o ali’i ma tama’ita’i asiasi
‘āoga, susū susuga i pule’āoga, o alo ma fanau ‘āoga mai Kolisi ‘ese’ese ua lautogia i lenei
fa’amoemoe, ma le lavaloa o le Matāgaluega.
O outou pāia ma mamalu, o le a nu’unu’u atu ia, ma lalagi fa’apitoauolagi i faiva o le utu gagana
ma lotoi’upu o le vaogagana, auā o pāia lava mai le vavau e o’o i le fa’avavau.
O le asō, ua fa’apitoa lea mo le tauā’aoina o fa’ailoga auā alo ma fanau, sa mafai ona tu’uina mai
lo latou sao ma auai i le tauvaga sa fa’apolokalameina e le Matāgaluega. E fa’aāogaina ai auala o
feso’otā’iga fa’atekonolosi po’o le TVET ONLINE Competition mo le Vasega 12 ma le 13, o
‘āoga uma o Kolisi a le Mālō, Kolisi a Ekalesia ma Kolisi Tumā’oti.
O le autū o lenei tauvaga e fa’apea “O le Lumana’i, o Faiva Alofilima po’o Matātā ‘Ese’ese /
TVET Skills for a Brighter Future”

O le ‘auga ma le fa’amoemoe o lenei polokalame fa’atauvaga, o le fa’alauiloaina ma le
fa’atāuaina o tomai ma agava’a o lo’o mafai ona tapu’e, ao’ao’ina ma ausia e alo ma fanau e ala
i matā’upu tau matātā ‘ese’ese o lo’o ao’ao’ina i totonu o ‘āoga.
E lē toe fa’ailoaina ma fa’amatalaina le tele o fa’amanuiaga ua va’aia ma o tatou molimauina mai
agava’a ma tomai lea o lo’o ao’ao’ina i matā’upu o matātā ese’ese, e pei o le Kamuta, Musika,
Tusiata, Kuka & Su’isu’i aemaise o le Faifa’ato’aga fa’apea Ta’aloga ma fa’agatama lea ua iloa
ai Samoa i le lalolagi.
O le tatou matāfaioi fai fa’atasi, e tauala atu i le Matāgaluega ia si’itia ao’ao’ga ma le fa’atāuaina
o matā’upu i matātā ‘ese’ese i totonu o ‘Āoga.
O le lu’itau fo’i lea mo i tatou uma. E tofu i tatou ma le pitolā’au e fa’atino ina ia mautinoa e
taunu’u lenei fa’amoemoe i le manuia, auā alo ma fanau, o le lumana’i lea o Samoa. E le gata i le
Mālō, le Matāgaluega ae fa’apea mātua ma ‘āiga ina ia lagolagosua i fanau iā latou ‘āoga.
Ia fa’amanuia tele le Atua i alo ma fanau ‘āoga. Ia outou lagonaina le tāua o ā outou taleni, poto
ma le atamai, po’o meaalofa a le Atua ua fa’aoloaina ai outou. O le fautuaga, ia outou finafinau
pea ma sogasogā ina ia fa’alautele ma fa’ateleina pea lo outou tomai ma agava’a auā se lumana’i
manuia. O ‘upu a le tusi, o se na ‘ave i ai taleni e lima, sa ia fa’aāogaina ma le fa’amaoni sa
fa’apea ona toe foa’i i ai i si taleni e tele.
Fa’afetai i mātua ma ‘āiga le lagolago i polokalame fa’alauiloa a le tatou Matāgaluega, fa’afetai
fo’i i afioga i Asiasi ‘Āoga, Pule ‘Āoga ma ‘āiga fai’āoga i so’o se Kolisi, aemaise o alo ma
fanau ‘āoga.
Fa’afetai,
Soifua.