O le a augalu pea ia liaga o le tai, auā e faigata le popo’e i sī’u papa; auā o lea ua mati’e le laumea o
le vasa ona o le alofa ma le agalelei o le Atua, ua afua ai ona tō i vao ni mala foufou, ‘ae ua tepa i
Taumeasina ma taga’i i Matagofie i lenei taeao.

O pa’ia o lenei aso i le:
Sūsū o lau Susuga i le Ta’ita’i o le Sauniga;
Sui o Mālō o Ausetalia ma Saina i Samoa nei;
Lau Afioga i le Komesina;
Le mamalu i le Pulega;
O pa’aga a le Matagaluega o Leoleo, Falepuipui ma le
Toefuata’iga;
Le tapua’iga a Aiga.

O le aso lenei ua tatou potopoto e molimauina ai le faau’uina o i latou o le a avea ma malu o le malo,
e tau’aveina nafa o Alii ma Tama’ita’i o Leoleo, Falepuipui ma le Toefuata’iga. Ia outou manatua lelei,

o outou tiute e tāua i le mālō o Samoa. Auā e malu ia te ‘oe aiga, e malu ia te ‘oe nu’u ma ekalesia,
‘ae sili ai ona malu ia te oe tagata nuu uma o Samoa.

E tulimata’i ā outou gaoioiga po’o talafeagai ma lā outou tautoga o le a outou tauto ai i lenei aso, ‘ae
maise lava le faatinoina o galuega e aafia ai aiā tatau a tagata. O mataupu ese’ese e sulufa’i mai ai
tagata i le Matagaluega nei mo se feasoasoani ‘ae maise o le malupuipuia ma le tapu’eina o le ola
toefuata’iga o e o loo nofo sala i so’o se falepuipui o lo tatou atunuu.

O le mea lea e faatāua ai i lenei taeao Amioga Tauoloa ua uma ona a’oa’oina ai outou, e le gata i le
faatinoina ai o galuega faaleoleo, a’o i latou fo’i ua ofoina le soifua e galulue i le Auaunaga o
Falepuipui ma le Toefuata’iga. O lona uiga, e lē o ni galuega faigofie, e feagai ma faigata ‘ae maise ai
o le taumate lea o lou saogalemu auā o le a e faamuamua le saogalemu o tagatanuu o Samoa ua
ofoina atu ai lou ola tautua. ‘Ae a faigofie fo’i, o lona uiga o loo tumau pea ma tupu le fatu na totō e o
tatou tua’a, a’o le faavae mausali foi lea o le Malo Tutoatasi o Samoa “E faavae i le Atua Samoa”.

E le toe nātia le tele o faafitāuli ua o’o mai i le Komesina, ‘ae maise le Pulega, o nisi fo’i o mataupu e
o’o atu lava ia te a’u. O nei mataupu e ono aafia ai lou tautigā lea ua a’e i le asō. E le gata foi i lea, ua
sulu tagata i seisi fo’i laasaga e faaali ai a latou faitioga, ‘ae e mafua mai lava i le leai o se tōfa sili
fetu’utu’una’i e faatino ai nisi faai’uga e sili atu ona lelei.

O le mea lea, o le valaauina o ‘oe i le galuega lenei, e lē o se galuega e tau lava na o le maua ai o le
tupe, pe taulagi ai fo’i lou tagata o le malu o le malo, poo lou fa’aaogaina fo’i o le malosi’aga ua tuuina
atu e te soona fai ai lou valaauina. ‘Ae o le valaauina o ‘oe e le Atua e avea le Matagaluega o Leoleo,
Falepuipui ma le Toefuta’iga e te tautua ai iā Samoa ma ona tagata.

O lona uiga e tatau ona faatāua muamua lau tautua lea, e tali atu ai i mana’oga o tagata lautele, pe ā
sulufa’i atu i le Matagaluega mo soo se fesoasoani.

Ia manūteleina le alo atu o outou o le Vasega Faau’u o le amataga o lenei tausaga 2021, i le
faatinoina o tiute tofia. Ia fai sau galuega ina ia faa’iiIa atili ai le auro a le Matagaluega ma ia fai ma le

loto toa i le ava fatafata, le alofa i tagata, e lē o le alofa e te faia ai ni auala sesē, ‘ae o le alofa e te
tausi ai ma le faamaoni ou tiute tauave.

Le paia i aiga ua mafai ona tatou molimauina lenei faamoemoe, mālo le tapua’i ma tatalo auā alo ma
fanau ua ofoina atu le soifua e ‘au’auna ai i lo tatou Mālo.

Lau Afioga i le Komesina ma le Matagaluega, mālo le onosa’i, e faamalo atu foi le mā’elega mo suiga
lelei e faaleleiina ai le auaunaga a Leoleo ‘ae maise le Auaunaga Faafalepuipui.
Ia maua pea le malosi auā le tautuaina o Samoa ma ona tagata, ma ia maua se Samoa saogalemu.