FOLASAGA MUA
Lau Susuga i le Taitai o le Sauniga Lau Susuga Fesoasoani Katoliko
Salesa Feo ma lau Susuga Rev Atapana Tupuola. O lea ua tu’utau
le va’atiu o tautai o le mafua taulafo, ae foisia i maota tapua’i le
Tanoa fa’aleagaga ale Ta’ita’i o le sauniga. Ua ma’ea la ona papae
utugaoā o le fili taliala, ae taumuaea i le viiga o le Atua, auā o lona
alofa lautele, ua mafua ai ona tatou aleaga aloalo i le manuia.
Malo faafetai oulua Susuga i Faafeagaiga. Ia to’ia pea i le mana o
le Agaga, le tofa fa’ale Atua, e paopao ai pea agaga o le nuu mo le
Atua.
PAIA
Ua faataumalama maota e fia o le tupua ma le La’o’ai. Aua le afifio
i le Nofoamatua o le aiga Sa Peseta. Afifio mai foi le Maveve ma
Lilo. Alalatai mai le mamalu i le Atifai ma upu ia te oe Matautu, o
le muaau faalele o le Gagaemauga ma Samoa atoa.
Taoto la’ia a o se ala ua ola. E motu fo’i a’o se fulu’ula ua manaia.
Ua papaga le papa le gae’e o Ali’I o le fono. Auā ua afio atu le
Afioga i Minisita Lagolago tainane Faipule o le tou itumalo. Afio
atu le Afioga i le Taitaifono o le Komiti Faatonu ma Sui o le Komiti
Faafoe. Afifio fo’i Faauluuluga o Matagaluega ma
Faalapotopotoga Tumaoti a lo tatou Malo, aemaise le mamalu
maualuga ua aofia i lenei taeao lavasia.
O paia ma mamalu na ua molimauina le faaiuga o le galuega i lo
tatou Afioaga nei.
TALA O LE GALUEGA

2
O le auala fou lenei ua ma’ea ona toe faaleleia ma fausia i lona
tulaga mautū e aofia ai ma alavai e tafe agai iai le vai to'a pe a
mamafa timuga.
O lenei galuega sa fausia ma mulimulitai'a i luga o aiaiga ma faiga
faavae o galuega faatino o auala tetele a le tatou Malo.
Sa faatauofoina faalauaitele e le Malo lenei galuega i le masina o
Oketopa 2020, mo le sailia ai o se kamupani e faatinoina lenei
galuega.
I le maea ai o le iloiloga a le Komiti, ma tuuina mai ai le fautuaga e
tuuina atu lenei galuega i le Savaii Transport i le tau e
$615,921.60 SAT ina ua faamalieina uma vaega sa tuuina mai i le
tauofoga.
O le aso 19 Ianuari 2021 na sainia ai loa le konekarate ale Savaii
Transport ma le tatou Malo, ma amatalia ai loa le faatinoina o
lenei galuega tele.
O le auala ua mae’a fausia e:-
● 1.7 kilomita le umi o le galuega ma ua vali taina
● 4 mita le lautele ua vali taina faatasi ai ma le fausiaina o
alavai.
Sa faatupeina atoa lenei galuega i lalo o vaega tupe ua faaagaga
mo galuega tetele a le tatou Malo.
FOLASAGA LAUTELE
O lenei auala o se auala sa fausiaina ma faatupeina i le tala
faatatau o tupe a le malo o loo faagasolo nei, 2019/2020, e ui i le
anoanoa’i o fuafuaga a le Malo o lo’o feagai ma ana Tala o le Tupe
o tausaga taitasi, ae o lo’o faia pea le faiva faasoasoa lelei ina ia
mafai lava ona faatino uma manaoga o le Atunuu. O le ala foi lea

3
ua faasoasoa gata ai nai tupe na pasia mo galuega o auala o lo’o
lavea i le Polokalame mo afioaga taitasi, ona o le tele o le
manaoga ae le a’ua’u le faasoa i vaega tupe o lenei foi tausaga.
Ui i lea, o le polokalame e le na o se tausaga se tasi, ae faifai pea i
tausaga uma ina ia faatofutofusia uma afioaga o le atunuu i luga o
tulaga ua aiaia lelei pe afai ua nofoia tumau e tagata.
UPU FAAMALO
Ou te momoli atu le faamalo ma le faafetai i la outou pule
faamalumalu a o faagasolo nei galuega.
Faafetai foi i le Konekarate a le Savaii Transport mo le faatinoina
o nei galuega i aiaiga na faatauofo ai.
E momoli foi le Faafetai i le Pulega o Felauaiga i le Laueleele mo lo
outou galuega faatino ua mafai ai ona tino mai le finagalo o le
tatou Malo.
Ia auomanū lenei aso i le alofa faasoa mai o le Atua mo tatou ma
si o tatou atunuu atoa.
Ia soifua ma ia manuia.