Lau Susuga i le Ta’ita’i o le Sauniga – Lau Susuga i le Toeā’ina – Rev. Iosefa
Uilelea,
Le pāia mauāluga o le Ekalesia E.F.K.S. i le Laulauāfono a le Fono Tele ua afifio
mai,
Susū le Ta’ita’ifono ma le Komiti o le Au Toeā’i’ina, le nofo a Toeā’i’ina ma le
loaloa o le Ekalesia,
O Pāia fa’aleMālō i le afio mai o Lau afioga i le Ao o le Mālō ma le Masiofo,
Tulaga Fa’alupe o le tafatolu o le Faigāmālō,
E fa’apito augafa se fa’afeiloa’i atu i lau susuga i le Fa’afeagaiga, Rev. Esera
Esera ma le pāia o le Ekalesia i Sapapāli’i nei,
Le afio mai o le nofo i le Tapā’au Fa’asisina, Sā Malietoā ma le Usoali’i fa’apea
le fa’autautaga iā Mago ma Luāsi’ufanua.
Ou te manatu ua ao fo’i Samoa i lenei sauniga, ou te fa’atalofa ma fa’apa’i atu
ma le fa’aaloalo iā Samoa i ona tulaga fa’alupe e pei ona tatou fa’atasi ai i lenei
taeao.
Ou te taofi, o le taeao manino ma le taeao toto’a lenei, na sulugia ai Matāniu
Feagai ma le Ata i le malama o pupula o le Talalelei, auā le Fa’aolataga a Iesu
Keriso, ua ao ai fa’alupega uma i lo tatou Tapā’au Sili i le lagi.
Ua mautū i le Nofoāli’i o le Atua la tatou fa’afetai ma le vi’iga i lenei taeao, auā
o Ia na mafua ai le asō. O lona finagalo tu tasi, sa fa’amatua i tumu i le filifiliga a
Samoa, e liliu ‘ese mai ona talitonuga anamuā, ae tapua’i i le Atua moni e
to’atasi, le Atua o Apera’amo, Isaako ma Iakopo.

2/3
O Ia ua goga ai le fa’anu’upō, ae gāfoa manino ai le ata o le satauro o le
fa’aolataga, ina ua talia e o tatou tuaā, le taunu’u mai o Ioane Viliamu i le 1830
i le afio’aga o le Susuga i le Tapā’au Fa’asisina, Sā Malietoā ma Usoali’i. E
fa’apea le fa’autautaga iā Mago ma Luāsi’ufanua.
Fa’amālō le sapaitali, fa’afetai le folau i le pāia o le Ekalesia Aoao, vi’ia le Atua
ua tatou potopoto i lenei taeao, tatou te patipatia le atoaga o le 192 tausaga
talu ona taunu’u mai le Talalelei i Matāniu Feagai ma le Ata.
A ua tutusa fola, ma matalua le seuga i lenei tausaga, auā le fa’amanatuina o le
60 tausaga o lo tatou Mālō Tuto’atasi.
A manatu i lo tatou Tala Fa’asolopito ma la tatou savaliga umi, e maofa le loto i
le finagalo alofa o le Atua iā Samoa. O mau fa’amauina i le ulua’i taunu’u mai o
le Talalelei, faimai sa mamafa le fa’au’uga ma le liligi ina ifo o le Agaga Pāia i le
atunu’u. E lē taumate, o le lagisoifua lea na vave ai ona o’o’o’o le tala’iga o le
talalelei i itu uma o le atunu’u, ma talia ai e finagalo o tagata Samoa, e moni le
Talalelei iā Iesu Keriso.
O le taeao nei, o le taeao o le fa’afetai. Tatou te tau fai lagona fa’atasi ai le
ta’ita’iga mamana a le Atua, ma lo tatou tofi na afua i le ‘ele’ele ma le afio’aga
lenei, e tu’ufa’asolo, e autupulagā ona manuia, ma e vavau.
O le ala lea o le tu’uālalo a le Komiti o Tapenaga o le Tuto’atasi a le Mālō, ina ia
aofia i le fa’amanatuina o taeao faitauina o le Talalelei i le polokalame mo le
fa’amanatuina o le 60 tausaga o lo tatou Mālō Tuto’atasi.
O le vaogagana o le faiva a tulāfale pe a ali’itaeao ma usu fa’aaloalo mauga
mauāluluga, e fa’ailoa taeao faitauina o le atunu’u, e lua i Salāfai, ae tasi i
Tumuā.
Peita’i, ua taoama, ae fa’asifo lo tatou ala i Mālō, i taeao iloga o le Talalelei. Le
taeao lenei nai Matāniu Feagai ma le Ata, Le taeao nai Faleū ma Utuagiagi, ma
le taeao nai Malaeola na Gafoaga. E fa’apea fo’i ona fa’atāua vaitau na taunu’u
mai ai isi Ekalesia i le atunu’u.
O lo tatou fa’asinomaga i le Talalelei, e tasi le tino, tasi le loto, tasi le agaga. Auā
o Iesu o le Ulumatua o mea uma na faia, o le Ulu o le Ekalesia, a’o tatou o lona
tino. O le mea lea, e mauāluga ai le fa’atāua a le tatou Mālō, i le saga unā’ia pea

3/3
o lo tatou soifuaga o se atunu’u, e fa’avae i le Atua le Tamā, le Alo ma le Agaga
Pāia.
O le auai mai o le afioga i le Ao o le Mālō, ma le tatou Mālō, o le fa’atāua lea o le
ulua’i taeao na taunu’u mai ai le Talalelei i Samoa, ma se’i o tatou osiosi fa’atasi
le tatou taulaga fa’afetai i le Atua, o le pogai o le Talalelei.
E fai ai a’u ma Sui o le tatou Mālō e molimoli atu le fa’afetai ma le fa’amālō i lau
susuga i le Ta’ita’ifono o le Ekalesia ma le mamalu o le Laulauāfono a le Fono
Tele, e fa’apea fo’i i le Faafeagai taulagi a Sā Malietoā o lo’o tausia le galuega i
Sapapāli’i nei, le pāia o le afio’aga mai ona pona o’o ma le loaloa o le Ekalesia.
Fa’afetai le taunapo i le toaiga o le ulua’i alofa, le fanua o ulua’i sulu o le
Talalelei i Samoa.
O le toe ‘upu, ia tuputupu pea lo tatou fiafia i le Talalelei. Ia mapo ma mau pea
le galuega mo le Atua. Ia saga fa’amumū le lamepa o le fa’aolataga, ina ia vi’ia
le Atua.
O le anava o le 60 tausaga o le tatou Mālō Tuto’atasi, ia tatou ‘Folau ma le
Fa’atuatua’.
O le tatalo ia tatou folau pea ma le fa’atuatua i le Atua, tatou te taunu’u manuia
ai.
Ia manuia le fa’amanatuina o le 192 tausaga o le taunu’u mai o le Talalelei i
Matāniu Feagai ma le Ata.
Soifua ma ia manuia.