O lea ua mae’a ona tatou patipatia le alofa o le Atua i lenei taeao e ala i le taulaga si’itia e le taitai
o le sauniga. Ua maea foi nisi o sauniga taua o feiloaiga e pei ona iai le aso ananafi. Ae ua paia
lenei taeao aua o le fa’amoemoe ua taunu’u o le laau o le soifua lea.
Tulouna le afio mai o lau afioga i le Kovana, fa’apea lau Kapeneta ma le mamalu o le au malaga
mai le Malo o Tutuila ma Manua. O le paia lava lea aua Sua ma le Vaifanua, Fofo ma Aitulagi,
Itu’au ma Alataua, Saole ma le Launiu Saelua. E fa’atulou atu foi i le Motu sa aua le afifio o
Fa’atui, Tootoo, ma upu i le Manu’atele.
I le agaga fiafia, ou te fa’ailoa atu ua fa’atasi ai i lea itu o le maota le Kapeneta ma le Pulega o le
Malo Tutoatasi o Samoa, e fa’afeiloa’i atu ai i lo outou paia ma le mamalu. O loo talimau foi le
tapuaiga a Tama ma o latou Aiga, Aiga ma latou Tama, Le usoga a Tumua ma Pule, Ituau ma
Alataua, Aiga i le Tai ma le Vaa o Fonoti.
Ua tauaofia le Atoa o Samoa i le asõ. Ua faiva ese ai le maimoaga nai Faleata, ona e le maualafia
avanoa fa’apenei tatou te alaala ma aleaga fa’atasi, ma Tamã matutua o lenei foi ituvai o le tatou
Aiga poo fa’auluuluga o le Tafatolu o lou tou faigamalo. O le tatou feiloaiga lona 4 lenei talu ona
toe amatalia le fonotaga fa’avaomalo o le Atoa o Samoa, ia Iulai o le tausaga na te’a nei. Se’i toe
fili ‘afa ma timata alafua o le galulue fa’atasi mo le manuia o tatou tagata nu’u. E fa’asoa ma
lauama to’oto’o mataupu o le ta va nonofo ma le mau fetu’unai o le tali atu i lu’itau o le atina’e
ma suiga o le tau.
O le fa’amoemoe o fetufaaiga i lenei aso, e matimati ai talanoaga anoa ma ni vaega fa’aauau o a
tatou taumafaiga ua taoto talu mai feiloaiga tomua.
Ia fa’atasi mai le Atua i le fonotaga i lenei aso ae maise o le fa’aiuina o le polokalame ma ona
tapenaga uma i le motu tele i Salafai i le aso Tofi. A tuu ama le fua ma taape le filialii i lenei afiafi,

poo aso o sosoo ai, mo le mamalu o le a le mafai ona auai i le Polokalame atoa, ia agalelei le Atua
i faiga malaga, Tatou toe feiloai i se taeao fou ua saunia e le Silisili Ese. Ia manuia tele le tatou
fonotaga.