Ou te faatulou atu i le paia maualuga o lenei sauniga;
I le Susu o lau Susuga i le Taitai o le Sauniga;
Faapea le nofo a Faafeagaiga ua o tatou mafuta faatasi;
Afio mai o le Sui Palemia ma Minisita o le Kapeneta, ma Minisita Lagolago;
Afifio Sui Mamalu o le Fono Aoao Faitulafono;
Le paia maualuga o aiga na lua, o paolo ma gafa o le Susuga iā Seuli
Le Faletua iā Su’a ma le nofoāalo;
Le paia maualuga o Samoa ua potopoto i ona tulaga faalupe;
Ou te faatalofa atu.

O ituaso faapenei, e faamau gagana e le poto o Solomona. ‘E foaiina e le
Atua i le tagata lona lelei i ona luma, o le poto, o le iloa, ma le olioli i lona
faiva e fai mona’. A o le mau a Samoa, e mafua ona fuga matagofie le fanua,
ona ua malie sua o le vai i le tautua. E mafua ona tautalaaso galuega; ina
ua niuali le tausi tapaau ma le osiosi aiga lelei. E afua ai ona saili mafua lelei,
ma tausili i le tauleleia, ina ia mapo le osigā taulaga.

O le agaga lea o lenei taeao, ma le auai mai o le tatou Malo i le toe sauniga
o le Tamā, le Susuga i a Seiuli Paul Wallwalk. Ou te talitonu ua taoto i
matagofie le talaaga o lona soifua tautua matavela i lo tatou Malo, ma le

atunuu. O se tamalii na iloga lona sao i le tapu’eina o le aotauina o fanau a
le atunuu i tulaga tau aoaoga. Ma o le tulaga mautinoa, ua mautofi ma mau
galuega lelei alo o le atunuu na aoaoina e Seiuli i le Kolisi o Avele mai i le
1967 i le 1982.

Na avea ma Faauluuluga o le Matagaluega o Tupulaga Talavou, Taaloga ma
Aganuu mai 1983 e oo atu i le tausaga e 2000, ma e tele faamoemoe tetele
o le Malo sa ia taulamua ai i lena vaitau.

E le tau toe faailo lona sao i le atinae o taaloga i le atunuu. E le gata o ia o
se tagata taaalo iloga i le tele o tausaga i le taaloga o siisiigā uamea mamafa,
a o lona sao tāua i le tapueina o pulega lelei o taaloga, ma le faafaileleina o
taleni a fanau taaalo o le atunuu. E faapea foi ma lona sao i le uunaia o
atinae a le Malo ma pulega lelei, e tauala atu i Komiti Faatonu sa ia galue ai
i tausaga ua mavae i le Malo. O le ala lea na fa’ae’eina atu ai e le tatou Malo
ia Seiuli, le faailoga ma le pine taualoa a Samoa, ‘le Ofisa o le Poloaiga a
Samoa‘ i le 2014.

Ou te faaleoina ai le faafetai ma le faamalo a le tatou Malo i le tautua a
Seiuli. O se tamalii sa faia le tautua malō, ma le tautua atunuu, auā sa pele
i a te ia lona faasinomaga. Sa ia pulunaunau ia tu maualuga le tagavai o lona
atunuu i le va ma isi atunuu. Sa lototele ma toa e faitaulaga mo ona tagata.
Lea ua malaga ma folau atu i lo tatou Nu’u tumau, a o ana galuega lelei, e
mulimuli atu ia te ia.

Ou te faafetai atu i le Faletua ia Su’a. Faamalo le lototele. Ou te talitonu sa
lua aufaatasi, ma mulumulu aufo’e ma Seiuli, e su’i le ula ia tau i le tini, auā
lona soifua tautua. A lea ua tele ona lagi soifua e pine a’i le tautua a Seiuli i
le Malo ma le atunuu. Ou te taofi o lo lua tautua faifaatasi lea i si o tatou
atunuu.

E masani ona mo’omo’o le vaogagana, pe afai e fāia se tasi o poututoa o le
atunuu. Ona faapea lea ‘talosia ia soso’o le fau ma le fau’, pe augani foi ‘aua
nei mavae le masina ma taena’i lona malamalama. O le tatalo lea a aiga, o
moomooga ia o le Malo ma le atunuu. E mafua i se a? E mafua ona le naunau,
ia aua nei mavae pe mou galuega lelei ma le tautua, na faia e tuaā ua tofafā
mai tiasā. Ou te talitonu e lē o mavae le faamanuiaga i lo outou aiga i le
taleni i taaloga, o loo tu maualuga ai Samoa, aemaise le tautua i le Malo o
loo tauaveina e nisi o alo o le Susuga i a Seiuli ma Su’a. E mafai ai ona
faapea, o loo so’oso’o fau le tautua a Seiuli i le Malo ma le atunuu.

O le tatalo a le tatou Malo, ia faamafanafanaina e le Agaga o le Atua le paia
o aiga, o paolo ma gafa, aemaise ē o tagi mai ala. Ia faalototeleina le Faletua
ia Su’a ma le nofoaalo. Ia tafimala le faigā malaga a Seiuli i lo tatou Nu’u
moni, o loo faatali mai ai lo tatou Faaola o Iesu Keriso.

Ia manuia lau Susuga i le Taitai o le Sauniga, aemaise Samoa ua potopoto.

Soifua ma ia manuia.