Faafetai i le mamalu o le tou komiti mo le valaauina o a’u ou te savalivali mai i lenei taeao, tatou
te feiloai ma asiasia le tulaga ua taoto ai le tou galuega.
O le a ou le agai lava i utuma’au aua o outou sā ma faigā. O sā e tumau pea e oo i le faavavau.
Ae o le ou agai sa’o i le mataupu sa valaaulia mai ai a’u.
Lea foi ua ua ou maua le otootoga o le tulaga o la tou galuega, ae le toe tele ni minute o totoe ona
ou toesea lea i le isi foi fono lea ou te tatalaina i le taeao nei, i le ta o le 10.00am.
O aga lava ia ua i ai lo tatou Malo i lenei vaitau. E le o se Malo tausi mamalu a o le Malo
faigaluega. E uma le vaiaso ua taoto polokalame ona o le tele o tagata ma mea e moomia ai au. A
ou le auai la ona faapea lea e faailoga tagata le taitai o le Malo.
O le ala la lea e le umi ai ona tatou feiloai, ae taua tele le galuega o lo o feagai ma outou.
Lea ua ou maua le faaaliga, ua 85 pasene la outou galuega, o lona uiga toe 15 pasene lea e totoe.
A o lea e faapea o le a faamuta le tou galuega. E lē tatau ona faamuta le tou galuega. O le a tou
fai mea lē atoatoa pe afai o le a alu alu faamuta, e pei o le sogaimiti ua pe’a mutu. Ma o se luma
lena o se komiti.
O le a saili vaegatupe e faatino ma faauma ai le tou galuega.
E ui ua uma ona faataoto tupe mo lea vaega ma lea vaega, ae leai se taimi talu ona ou Palemia
ma ou Minisita o Tupe ua uma ai ni tupe a le Matagaluega. E oo ane lava i le faaiuga o le tausaga
faaletupe o lo o totoe tupe. E malamalama lelei i ai Tagaloa Pita sa Minisita ma Tolofuaivalelei.
Ae faapea lava galuega a le Malo. A avatu Tala o Tupe ona fuafua lea i ai galuega, ae oo ane
lava i le faaiuga o le tausaga e lē 100 pasene le faauma o le faaaoga o tupe. E i ai isi vaega tupe
ua uma ae i ai isi vaega e totoe. Ona aumai lea o vaega tupe totoe faauma ai vaega ia ua uma. O
aga na e faatino ai galuega a le Malo.
E leai se taimi ua alu alu ai tapuni le Malo. Ae ua outou faafogafoga, ua faatolu ona tapuni le
Malo o Amerika ua leai se tupe, ae le i tapunia lava le tatou Malo ona o le leai o se tupe, ona o le
faasoasoa mea lelei o latou ia e faafoea Matagaluega.
Lea e totoe le tou galuega e le i maea, e i ai le lagona o le Kapeneta e faaauau le tou galuega.
O le tou galuega e le o se galuega e tatau ona faapa’ole ona fai, leaga o le gagana o le fatu lea o
le tu ma agaifanua a Samoa tatou te pasi atu ia tatou fanau ma fanau a fanau.
A uma le galuega lenei ua outou faia, o le uluai galuega ua o’oo’o lava i ona o’oo’oga, ma e
tumau e faavavau. E tusia ai ma tou igoa ma tou suafa.
E le gata o le a faaaoga e fanau a Samoa i le lumanai, i Samoa nei a e o le a avea foi ma tusi
taiala mo fanau a Samoa i atunuu i fafo.
Lea ua avea nei le gagana Samoa o se mataupu e su’e ai faaailoga o le BA, MA ma le PhD. Lona
uiga e le o se galuega e puupuu lona aoga. E uma atu a tatou auga tupulaga ae aoga pea. O lona
uiga la e le o se galuega e tatau ona alu alu ona faamuta lea.
Atonu foi e alu alu i se taimi oi luma, ona toe review (iloilo) lea e la tou komiti. Talosia ia umi
pea lo tou soifua. A o e soifua pea i na taimi, e tatau ona tuu pea i ai se avanoa e toe tilotilo i ai

ma silasila pe tatau ona toe faaopoopo, pe i ai foi nisi mea e toese. Aua a alu atu le galuega lenei
ma faaaoga e le gata i faleaoga iinei a o fafo, e ono tele lava ni fautuaga e toe tuuina mai.
Aemaise foi o le tatou gagana lea ua filogia i nisi o upu aitalafu mai isi gagana. Ou te taofi la e
matua taua lava le tou galuega lea e fai nei.
Ou te malamalama lelei i le talaaga o le galuega lenei, ua silia ma le 30 tausaga o taumafai. Ma o
se galuega e faia ina ia tasi ma loloto le gagana a Samoa. Sa le i auai le Malo, ae sa amata e nisi o
tagata aoaoina o le tatou atunuu. Sa faatino le latou galuega i le agaga talitonu na amatamea ai
latou. Pei sa avea o se komiti. Sa taulamua ai nisi o tatou e pei o le Afioga ia Aiono Fanaafi ma
nisi faapea foi ma faiaoga mai Niu Sila ma Ausetalia ma Amerika.
Sa fai fonotaga a lea komiti i laumua eseese i Samoa nei, Hawaii, Ausetalia ma Niu Sila.
A o lo’u iloa o le mea lenei, ona sa i ai taimi sa usuia ai le fono i Samoa ma valaau atu ia te a’u a
o o’u Minisita o Tupe ou te sau e fai sina a’u upu faamalosi’au. Na ou mate’ia lava ua valaau atu
ia te a’u, lona uiga o le tupe lava lea e to’ia ai le latou galuega. Ona ou sau foi lea o a’u fai a’u
fagogo e lilifa i le ote i isi taimi, ae lilifa foi i fautuaga lelei i isi taimi. Ae sa faaaauau lava le
latou fonotaga. Ae sa ou matauina pea e le i tapa le Matagaluega o Aoga, lea e gafa ma le
aoaoina o le gagana.
Ou te lagona e taua le latou faaiuga sa fai, ina ia tutoatasi pea le faatinoga o le latou galuega ‘aua
nei influence pe taofiofia pe faataoto ni tuaoi ona o ni manatu e sau faapoloaiga mai faiaoga ona
o le tulaga o le Malo.
Sa ou matauina le latou galuega sa fai e independent pe tutoatasi. Sa usu fono iinei, usu foi i fafo.
Ua alu alu lava le galuega, ae na ou faalogo e faapea e faatu i Amerika Samoa ia le nofoaga
tutotonu, le laumua o le gagana Samoa. O le mafaufauga na faavae faapea, o lona uiga e
amatamea ai latou mai Amerika Samoa, ma o le a tele se tupe o le a sasaa mai e le Malo Amerika
e faatupe uma ai mea nei.
Ae pei lava ona tatou iloa, o le tele o mea e sau mai Amerika Samoa, o mea o miti.
Pau lena o le mea e lelei ai Amerika Samoa na o le miti miti miti, ae uma ane lava e leai se mea e
faatinoa. Oo mai nei e le o tutoatasi le atunuu aua e miti lava taimi uma. Tulaga lena na alu alu
lava, iloa mulimuli ane e leai lava ma se mea faapena o i ai, o lona uiga ua mao le faatuatuaga
aua o le taimi lea na agai lava le mafaufauga i le galuega ma le tupe e faatino ai, ae misi lava le
mea e tasi, faatoa oo i ai le latou faatofalaiga mulimuli.
O le mea lenei o le gagana, o le gagana e ta’u ai le Malo ma le atunuu. E le o se gagana e nofo
lava se komiti ma faatu, pe faatu i Niu Sila pe faatu i Ausetalia, ona faapea foi lea o le gagana
Samoa sa’o lea e tatau ona mulimuli ai. O le itu la lena faatoa tau i ai mafaufauga mulimuli, ma
iloa ai loa iina, le tele o le sese lea e i ai. Sa tatau ona aafia ai le Malo i le taimi lea.
Sa tatau ona saofai ai totonu le Matagaluega o Aoga. Aua o le Matagaluega o aoga lea e aoaoina
le gagana, o i le ki atoa ma le lumanai aua a oo loa ina faataoto le gagana sa’o e tatau ona ta’u le
Malo e ana le gagana, ae e leai se isi Malo o Samoa o i ai, e ese ai ma le Malo lenei. Le ala lena
sa tau manatu ai latou ia, e ave i Tutuila, ae le o se Malo tutoatasi, e pulea e le malo o Amerika.
Pei la o iina faatoa sagatonu ai loa le mataupu ma amata ai loa ona valaauina le Matagaluega o
Aoga, faatoa taoto ai loa i lagatonu le tulaga e tatau ona fai se Tulafono ma o le Tulafono ma le
gagana e tatau ona faavae i le Malo o Samoa i sisifo o le Malo e tutoatasi. O le gagana a le Malo
e aoaoina ai ana tama fanau mo le agai i le lumanai, nei ma eluā.
Nei ua taoto le faamoemoe, avatu ai loa ma le Tulafono auala atu i totonu o le Matagaluega o
Aoga ma pasia ai loa, o iina lea faatoa faatu aloaia ai loa le komisi.

Ua fai si leva ona pasia le tulafono a o lenei e le i ai se gaioiga. Lea na faatu ai loa lea o le tou
komiti e faatinoa le galuega e tatau ona faatino, ua silia i le 30 tausaga o talanoa ai pea i latou o
le gagana Samoa a o lea ua faatino e outou.
O lona uiga e le puupuu le tele o le tiute lea ua tuu atu i tou tauau. Pau lea o le auala e pasi ai mai
ia tatou ia tatou fanau, ma i latou e tutupu mai i aso o lumanai le gagana tatou te mitamita ai, o le
gagana lea a Samoa. Tele atunuu ua alu alu lava mamate a latou gagana. A ua agai tasi i le
gagana peretania. Tau mai i le taimi lenei o lo o taia pea i le faalogo i fonotaga a taitai o Malo a
le Pasefika, le isi lea auala e faigata ai tele ona atinae le atunuu lea o Papua Niu Kini, ona fai mai
e 700 gagana, isi taimi 800 pe 900 gagana eseese i Papua Niu Kini. Fai mai afai o si tama’i nuu e
nonofo i le isi tafa o le mauga, e ese le latou gagana mai le isi nuu i le isi tafa o le mauga. O le
faigata lena e oo mai nei ona atinae le atunuu o Papua ona e le tasi se gagana.
Lea ua sosolo atu gagana Peretania, ma ua aoao ai le toatele o fanau i le gagana Peretania, a ua i
ai taimi e leai ai latou gagana, ae lilifa loa i le gagana Peretania.
Ma o le tele o taimi ou te vaavaai ai pea i le TV ma le tele o tatou fanau ua agai ina talatalanoa i
le gagana Peretania.
O le ala foi lea e Taumafai ai le tatou Malo e faataoto isi faavae eseese e pei …’E le toe
faaperetaniaina Pepa a le Kapeneta ua faasamoa uma lava Pepa a le Kapeneta.’
Ua oo i sauniga a le Malo, lea ua i ai le isi faiga faavae a le Kapeneta, soo se sauniga a le Malo e
le o toe faaperetaniaina ni lauga a Minisita. A i ai se lauga faaperetania, e ta le faaliliuga, ona ave
lea tufa ae faasamoa pea le lauga. Leaga o le mea mataga lea ua tupu nei, pe tasi pe lua palagi e
auai, a o lea o le a faaperetania atoa ai le lauga.
O le tulaga la lena, ia faataua pea le tatou gagana .
E momoli atu ai le faamalo. Lea ou te vaai atu i le vaega lea e le i tagofia le gagana ia e sau
totonu o le Tusi Paia, i nisi upu o faaaoga e faapena foi ma isi tusitusiga i nusipepa.
Ae taua ia a’u le itu lea, lea foi ua uma ona tou tagofia gagana o lo o faaaoga e Ekalesia. Matua
tele o upu aitalafu. Ia te a’u lava ia, pei e i ai loa ni upu faapea, e ala ona faaaoga, ona e pei e
augata i latou e faaaogaina upu ia e faaaoga a tatou lava upu. O lona uiga o lo o i ai lava a tatou
upu ae le o faaaogaina. O la’u la tu’ualalo, ia manino, ia i ai upu ia, ae ia indicate foi a tatou upu
ia talafeagai.
O le isi upu o le taua ia mo Ekalesia Kerisiano i Samoa, o le upu lea grace lea e faaaoga e le
Ekalesia Katoliko le upu lea o le kalasia. O le upu taua tele lenei i le mataupu silisili ‘grace of
God’. Aua po o ai lava le tagata agasala ae faaolaina i le grace of God.
E taua tele le faauigaina ina ia atoa uma ai tagata Kerisiano, aua o lea e faaliliu sao mai le upu.
Ou te leiloa po o le faalatina le upu lea o le gracia, lea la ua faakalasia.
O le isi lea Ekalesia (Katoliko) matua tele upu faaletonu ia e faaaoga. O le isi Ekalesia o le
Ekalesia a le alii lea o Maiava… upu pilisitua ma isi lava mau upu, a o lea lava e i ai lava a tatou
upu o le tatou gagana.
Pe mafai la e le malosi lea o le tou komiti, ona faaaoga pea a tatou upu lea e i ai. Le isi upu e
masani ona fai mai ai a’u faafiafiaga i luma o le TV pe a oo ina talanoa i tulaga o le Tusi Paia, e i
ai upu na ou tau i ai, na lauga ai le isi faifeau, na lauga loa o’u alu su’e, ou te le malamalama ai.
O le upu lea, ‘a le tu a le tu lava’. Lea la ua faaaoga e le Katoliko i isi ana publications. Le upu
lea, ‘a le tu a le tu lava’. Matua o’u leiloa le uiga o lea upu, na ou tago loa lea su’e, lea na faatoa
ou malamalama ai i le uiga o le upu lea, ‘forever and ever’.
O lona uiga, o upu ia sa faaaoga e tatou tuaa i na ona aso ae ua le toe faaaogaina i lenei taimi.
Ae lafo atu pea iina i le tofa a outou toeaiina o le tatou gagana, e le i soona tofia outou. Na ala
ona tofia outou ona o le talitonuga o le Kapeneta, o outou o toeaiina o le tatou gagana.

Tou te silasila ane ai pea i le tele o upu ia e faaaoga i totonu o le Tusi Paia e ‘oa ai foi le tou
galuega ina ia faigofie ona tilotilo ai tagata, a tau loa i ai ona refer lea i le tou galuega ona iloa ai
lea o le uiga.
Faamalulu atu pe afai ua tou maitau mai ua lē tamalii foi nisi o upu.
Ou te momoli atu le faamalo i galuega e tele o feagai ma outou, o lo o galulue ai, o le tou sao foi
lena i le tatou Malo.
Matou galulue mai i le la itu, o matou foi o tagata faigaluega a le Atua pei foi o outou.
O tatou galuega laiti lava e faamasino mai e le Atua, aua e tele le aoga mo a tatou fanau.
Lenei taimi, toe momoli atu le faamalo. A o le itu lea sa avea ma ila i lo tou faamoemoe i le
seleni, taatia mai le tou mataupu lea o le a faatino e le faauluuluga o le Matagaluega, o le lima
taumatau lea o outou aua sootaga ma le Malo.
O se upu puupuu lea e avea ai a’u ma sui o le Kapeneta e momoli atu ai la matou faamalo.
Soifua.