Ua fa’apōpō ni aso ua ao aso folau e lē tuua, ua mae’a ona tatou si’i taulaga i le tatou
Atua e sula lona alofa ma lona agalelei, ua uma fo’i ona paepae mulifanua ua
potopoto moli i le futi afu e tasi i lenei taeao.
E manatu e pi’iama pea i le fa’afetai i le Atua ona o lona agalelei ma lona alofa, ina
ua au i manū i lenei taeao ma taunu’u manuia le fa’amoemoe o le fa’atautoga o le
Minisitā Lagolago.
O lea ua uma ona soālaupule i le Kapeneta, i tulaga o Matāgaluega ma
Fa’alapotopotoga e pei fo’i ona ou tā’ua i isi fa’atautoga ua mavae o Minisitā
Lagolago.
O le fa’amoemoe ina ia galulue fa’atasi ma Minisitā e poupou ma lalago fa’atasi la
tatou galuega ia ‘aua ne’i i ai se isi e lē o’o i ai le auaunaga. O lona uiga e le’o se
avanoa fa’atauva’a ua tofia i ai a outou afioga i Minisitā Lagolago, o tofiga o
Minisitā Lagolago o le avanoa e pei ona ou tā’ua muamua e fa’amasani ai i galuega
fa’apulega e ‘ese mai i galuega fa’apalemene e pei ona i ai Komiti ua tofia ma
valaauina ai fo’i lo outou pāia e galulue ai.

I totonu lava ia i galuega tau pulega e tāua tele ona tausoa fa’atasi ma a outou
Minisitā a outou galuega ina ia outou galulue fa’atasi ai e oloolo pito va’a fa’atasi i
la tatou galuega.
O le filifilia ai o lau afioga Tagaloatele Papali’i Poloa i le Matāgaluega o Pisinisi,
Ālamanuia ma Leipa (M.C.I.L.) i le taeao nei, ua talafeuga ma le si’itia o galuega o
lo’o mo’omia ona fa’ataunu’uina e le Matāgaluega, e aofia ai le suiga o le tulafono
ua ta’oto nei i le Palemene, ae faitauina ai fo’i su’esu’ega e tapena i le tatou R.S.E.
galuega faavaitaimi, e lā fesiligia ua matuā lava le oa o le tamāoā’iga o manatu,
agava’a ma tomai e tau’ave ai lenei galuega.
Ou te fa’amālō atu Tagaloatele ou te faapea atu, ia saga’i ane ia ai o le tai, o ou māmā
na, ia alofagia e le Atua pulepule tetele, puipui lou soifua tautua mo Samoa ma lana
Faigāmālō.
O lea ua se’e lo tatou sa, o lona uiga e mo’omia tele lou taimi ma le avanoa e te lua
mafuta ai ma lau Minisitā ina ia fa’asoa atu i ai le tatou galuega. Manuia toe taimi
o lenei aso.
Soifua.