Lau Susuga le Fa’afeagaiga, po’o le Tausi Matagaluega – Rev. Lone Urima
mai le Ekalesia Metotisi i Pitonu’ū-uta,
Afifio ta’ita’i o Vaega eseese o le Soifua Maloloina,
Le paia o afioaga, o tupu ma e’e, sa’oa’o ma tama’ita’i aemaise le malosi o le
nu’u.
O paia lava ia aua le afio le Aiga Samoelēoi ma Tapaau, afifio Alo o
Lilomaiava faapea le Va’aitī ma le Va’a’īmalae, Alalata’i le nofo itūaiga i le
Alataua.
Malo le folau i lagi ma, malo le soifua maua!
O lea ua uma ona mua mea i Matautusa e pei o le tala ia Moa’ula, ma fa’afo’i
lapalapa o mālō i Foga’a le pule alofa a le Atua soifua.
O le asō, o lea ua tau ‘ai o lapega e pei o upu e fai i faiva o tapalega, ua tatou
fa’amanatuina ai le tāua o le Vaiaso o le Soifua Maloloina i Samoa.

O lenei vaiaso fa’apitoa e fa’amanatuina i tausaga ta’itasi i le masina o
Novema, ma ua fa’ailogaina fa’atasi ai ma le Vaiaso e fa’ataua ai le
Fa’aaogaina Tatau o Fuālaau ma Vai Tui.
O le tausaga nei, o nei polokalame tu’ufa’atasi o lo’o taialaina e se tasi o
polokalame fa’asoifua maloloina ua leva ona fa’atinoina i nu’u ma afioaga i
tausaga ua mavae, ua ta’ua o le PEN Fa’asamoa. O lona uiga, o se aotelega o
polokalame fa’asoifua maloloina mo puipuiga o gasegase ogaoga e a’afia ai
totoga po’o gasegase tumau.
E tusa ai ma fa’amaumauga, i totonu o le itulagi o le Pasefika i Sisifo e
maualuga nu’u Polenisia e iai Samoa i le fuainumera o tagata ua a’afia i nei
gasegase ogaoga. O nei gasegase e aofia ai le suka, toto maualuga, ma’i fatu,
kanesa ma isi.
I le tausaga e 2013 e tusa ai ma su’esu’ega, e sili atu ma le 85% tagata matutua
o Samoa na maua i le tino puta ma le 63% e tino puta tele. E 50% i latou e
maualuga le fua o le suka. I le tausaga e 2018 i fa’amaumauga, o Samoa e
numera fa i le fa’asologa o nu’u e 21 o le Atu Pasefika i Sisifo le maualuga o
tagata na maliliu ona o le ma’i suka, ma e faapena fo’i i nisi o fa’ama’i e a’afia
ai le fatu faatasi ai ma gasegase o le kanesa.
E le o se fuainumera la’ititi, ma o le popōlega ona ua iai fo’i fa’amaumauga
lata mai, ua tele ina a’afia alo ma fanau, o tupulaga talavou, o tina ma
tama’ita’i, ma ua to’atele ua maliliu i lalo ifo o le 50 tausaga le matutua.
O le toe fa’aauauina o le polokalame o le PEN Fa’asamoa po’o Polokalame
mo Puipuiga o nei fa’ama’i lea e fa’aa’oa’oina ai Komiti o Tina, e fa’aauauina
ma tulituliloa e falema’i fa’aitumalo. O le a aogā lea ina ia vave ona iloa ma
togafitia, ma ia vave fo’i ona puipuia.

Ua so’o uma nu’u ma afioaga o lo’o i le va’aiga a falema’i fa’aitumalo ua
mae’a ona fa’atinoina ai lenei polokalame, ma o lo’o fa’aauau pea le galuega
tulituliloa. O lea ua o’o mai le polokalame i tatou itumalo o lo’o i le va’aiga a
le falema’i i Satupa’itea i Savai’i, faapea ma Faleolo i Upolu.

O le taumafaiga i le tausaga lenei ua manatu le Matagaluega o le Soifua
Maloloina i le taua o le tu’ufa’atasi o polokalame fa’asoifua maloloina e
fa’atino fa’atasi. E le gata e laititi le taimi e fa’atino ai, ae o le a faigofie i nu’u
ma afioaga le omai fa’atasi i le taimi e tasi. O le malosiaga o lenei polokalame
e pei ona iai lona auivi atoa, o totonu o nu’u ma afioaga, ina ia tapu’e ma
fa’aa’oa’oina i tomai ma agava’a e ala i galuega fesoasoani muamua. O
galuega e pei o le fuaina o le toto, mamafa talafeagai, faapea ma le suka.
O le a fa’atino ai fo’i polokalame faasoifua maloloina e fa’aofi gofie, e tali atu
ai i le tulaga ua iai le a’afiaga o nu’u ma afioaga. E pei o le taumafa tatau, o
togalaauaina, o le fa’atinoina o faamalositino ma isi. O le filifiliina o Komiti
o Tina e fa’atinoina lenei galuega ona o lo’o iai le maopopoga i nu’u ma
afioaga, ma o le agaga maualuga ina ia galulue faatasi ma Fono Fa’avae o
Itumalo ua iai nei.
O le atoaga o lenei polokalame o lo’o fa’atupeina e le Faletupe o le Lalolagi.
E fa’afetai ai le Faletupe o le Lalolagi faatasi ma le lagolago a Malo o Niu Sila
ma Ausetalia. E le gata i lea o lo’o fa’aauau pea le lagolago a le
Faalapotopotoga o le Soifua Maloloina i le Lalolagi e tauala i nisi o
polokalame.
Ou te fiafia e toe fa’ailoa le mamalu ua aofia ma le lagolago a nu’u ma afioaga
ua auai mai. O le tu’ualalo a le Matagaluega;
• Ia fa’aaoga avanoa ua maua.
• Ia amata ia te oe puipuiga o lou soifua maloloina ma e taua tele lou
lagolago e ala i nei taumafaiga fai fa’atasi.
• E tele ni vaiaso o le a tatou mafuta ai e fa’aauauina ai lenei polokalame
ina ia mautinoa e iai se aoga ma ia fa’aititia le tele o o tatou tagata ua
a’afia ma maliliu ona o nei fa’ama’i.

• Ia tautuana inumaga o fualaau ma vai tui e pei ona fa’atonuina e le foma’i
• Ia fa’aauau puipuiga masani i le tumamā lautele i aiga ma nu’u, e puipuia
ai mai le ono o’o a’afia i ni gasegase.

Ua tele taumafaiga a le Malo e tauala atu le Soifua Maloloina i polokalame
fa’alauiloa, o a’oa’oga mo le soifua manuia, o tulafono ma alafua ua
fa’ata’atia ae peitai e mana’omia le toe si’itia, ma aua nei muta le
taulogologo. O le taulogologo e tupu ai le fa’atuatua, ma o le fa’atuatua e
tupu ai le fa’amoemoe. Ae a aunoa ma le galulue fa’atasi e faia fua a tatou
taumafaiga.
Fa’atasi mai le Atua ina ia sao ma uli a tatou taumafaiga uma aua se Samoa
maloloina. Ma e fiafia e fa’ailoa ua tatala aloaia ai la tatou Vaiaso o le Soifua
Maloloina i Samoa, o le Polokalame a le PEN-Fa’asamoa i le tatou itumalo i
Satupa’itea nei. Faatasi ai ma le Vaiaso e Fa’ataua ai le Fa’aaoga Tatau o
Fualaau ma Vai Tui.
SOIFUA