Susu Lau Susuga i le Ta’ita’i o le Sauniga, lau susuga Tavale Matai’a;
Le Vasega o Faafeagaiga o le talalelei ma a otou faletua
Afioga lau Afioga i le Tama’ita’i Palemia ole Malo o Samoa,
Lau Afioga Fiame Naomi Mata’afa;
Afifio afioga i Minisita ole Kapeneta ma Minisita Lagolago
Le mamalu sui uma o Autalavou mo Keriso ma le paia o Samoa ua potopoto
Faatalofa atu i lenei taeao matagofie.

Tau ia ina o matou fatu le fausa ma sugi le taupulapula e pei ole fetalaiga mai le
mali’olagi nai le lotoi o le si’upapa ma matemate ai filiga o malo, aua lenei
fa’amoemoe ua taunu’u, o le la’au o le soifua lea. Ua fa’amalo le pale, malo le folau
i faiva ma tiute o loo alo’aao fa’asolo i ai le mamalu eseese ua aofaga potopoto i
lenei taeao, aua lo outou vala’auina. Malo afua ailao ua maua, a’o usiusi
va’afa’asavili pea le alofa male agalelei taumulimuli, o lo tatou Matai Sili oi le lagi i
lo outou soifua laulelei ma so matou ola.

Matou te fa’afeiloa’i fa’apitoa atu i Lau Susuga Tavale Mataia, le Faletua aemaise le
aiga ali’i, ona ua mafai ona tatou fa’atasi i lenei taeao e molimauina lenei faamoemoe
taua, tatou te patipatia ai galuega sa oulua totō le fatu, ina ua faavae le Autalavou
mo Keriso i Samoa i le 50 tausaga talu ai.

E faafeiloai atu foi i le Taitaifono o le Fono Faatonu a le Youth for Christ, le Faatonu
ae maise le Augalulue.

E faatalofa atu foi i nofo a faafeagaiga o le talalelei ma o outou faletua mai atunuu
mamao, aemaise Samoa ua mafai ona tatou faatasi i Matafelefele i lenei taeao sa
lupe. Sa outou saili i le Atua, ma ua faamanuiaina outou. Afifio maia, susu mai ma
tala mai aao.

Ia, ua umi le faafeiloai i lenei taeao, ae e iai le manatu, ia sala i le umi aua ou te
talitonu, e le o se matatia ausiagofie le 50 tausaga, ma ou te manatu foi, e le o se
malaga sa solo lelei i aso uma. Sa tele luitau na feagai ai, a o le Alofa o le Atua ua
mafai ai ona tatou feiloai i lenei taeao matagofie i luma o Nuu, ae le o tua o Nuu.
Malo le folau i le Aiga YFC ua malaga mai ma e, o lo’o alala ma papaaao i Samoa
nei – i latou o lo’o galulue ma sa galulue aua fuafuaga ma tapenaga a le Autalavou
mo Keriso i Samoa.

Ou te momoli foi le Faafetai mo le avanoa ua mafai ai ona tatou faatasi.
O Fepuali i le tausaga 1973, i le 50 tausaga talu ai, na Faavae ai le Autalavou mo
Keriso i Samoa – Youth For Christ ma le faamoemoe, e le o se lotu po o se tapuaiga
a o se faalapotopotoga e unaia le ola faleagaga ma le ola faakerisianoina o tupulaga
o Samoa. E galulue vaavaalua ma faafeagaiga o Ekalesia Kerisiano i Samoa, e tapue
soifua ma ola o alo ma a tatou fanau, o le lumanai o aiga, nuu ma lo tatou Atunuu
pele o Samoa.
O le uluai faavae ai lea o se faalapotopotoga mo Samoa aoao, e ‘auga i tupulaga
talavou, e ese mai mafutaga faaautalavou i totonu o lotu taitasi ma le saofaiga a
afioaga ma alalafaga e ala i aumaga ma aualuma. O le mafai e le YFC ona galue e
aumai faatasi lotu Kerisiano eseese o se itu na tulagaese ai lona faavae mai.
E talitonu le manatu o le amataga po o le la’a muamua o so o se faamoemoe, e
matua faigata. E tatau ai ona ave le faamua i e na mua mai, o i latou ia na asaina le
gasu o le taeao! E faapea foi i le galuega i le faavaeina o le Autalavou mo Keriso. E
faafetai ai le Alofa ma le Faasoa a le Atua ina ua usitaia e le Susuga ia Tavale Mataia
le valaau ma le musumusuga a le Agaga o le Atua, aua le taitaiga ma le amataga o
lenei galuega.

Na taliu mai le Susuga Tavale i le maea ai o aoaoga faasikolasipi i Niu Sila, ma amata
lana tautua o se faiaoga i le 1971 agai i le 1972 i le Apia Primary, sosoo ai ma Leifiifi
Intermediate i Malifa.

O le tausiusiuga o le 1972, na toai atu ai le savali a ni tamaalii ole talalelei – Le Susuga
ia Ene Sagala, Max Rasmussen ma le Susuga ia Rev. Jerry Appleby, i le Susuga ia
Tavale Matai’a aua le taitaiga o lenei galuega taua. Mulimuli ane na faaopoopo iai
ma le lagolago a nisi foi tamaalii, e pei o le Susuga ia Andy Forsgren ma o latou
faletua.

Na vaaia le uluola o le galuega i le taitaiga a le Susuga ia Tavale ma lona Faletua ia
Alison atoa ai ma le lagolago a le auvaa o le aufaigaluega a le YFC. Sa faatino
taumafaiga eseese e aofia ai polokalame faasolo i totonu o Aoga, o togalauapiga ma
mafutaga, o talai’ga sa faatino i nofoaga faitele, atoa ai ma aoga tusi paia sa faatino
i nuu ma afioaga. Na faaauau le tuputupu ae o le galuega ina ua see le taitaiga o le
Autalavou mo Keriso i le Susuga ia Viliamu Mafoe mai le 1986 seia oo i le tausaga
1997, ina ua faavaeina le Ekalesia Worship Centre i Samoa ma atunuu mamao.
O le aso lenei, e le o se aso e tolaulau ai ni lelei o le tagata – a o le aso e ave ma
faatumau le Viiga o le Atua aua, o la tatou savaliga e fai ma le faatuatua i le Atua o
loo tatou auauna i ai, e faataunuu ana Fuafuaga i Lona Finagalo Silisiliese, ae a iai so
tatou sao – amuia tatou

Ou te manatu, e lei taunuu le tatou malaga – e faaauau pea, aua o lo o tulai mai pea
luitau fou o lo o aafia ai ola o a tatou fanau – ua vaaia le televave o tuinanau o le
social media, ua oo mai i le tatou atunuu fualaau oona ma fualaau faasaina, le sauaina
o tina ma fanau ma vevesiaiga i totonu o aiga taitasi ua faatuputupulaia. YFC ‘aua la
le fiu, ‘aua le solomuli pe faavaivai ae ia taula pea i le Papa e le Faagaeetia o lo tatou
faatuatuga faaKerisiano – o le Faavae foi o lo tatou Malo Tutoatasi – le Atua le Tama,
le Alo ma le Agaga Sa. Ia otou faaauau pea le tapueina o agaga ina avea pea
Autalavou mo Keriso o se autau a keriso i Samoa nei ma atunuu i fafo e tineia le fili
ma le tiapolo.
Faata’i ai ma so’u leo, e avea ai a’u e fai ma sui o le Malo Tuto’atasi o Samoa, e avatu
pea le lagolagosua i polokalame fai a le YFC, e momoli atu ai foi ma mo’omo’oga

alofa ma le fa’amalo i le Autalavou mo Keriso i Samoa, mo galuega lelei o lenei 50
tausaga ua ausia. Tumau pea i le Alii, Taula’i pea i le Alii, ma faatuatua ia te IA, o
outou lumana’i ma galuega mo le fa’aolataga ma le fa’asaolotoga o agaga o alo ma
fanau o Samoa.

E ia te a’u ai le ava ma le fa’aaloalo tele e tatau ai, ou te tatalaina aloa’ia ai le
fa’amanatuina o le 50 Tausaga o le Autalavaou mo Keriso – Samoa Youth For Christ.
Atoa ai ma la matou tatalo, ia saga fa’amanuia mai le Atua i ta’ita’i, susuga i
fa’afeagaiga ma o outou faletua ma aiga, aemaise sui uma o lenei fa’alapotopotoga.
Ia faatuputupulaia pea lo outou fa’atuatua ma le galulue tautua pea mo Keriso ma
lana Ekalesia.

Ia manuia tele le 50 tausaga o le Samoa Youth for Christ.
Soifua ma ia Manuia !!