Aso Faapitoa o Meatotino Tau le Atamai a le Lalolagi

Le paia ma le mamalu ole au usufono.
O lea ua mae’a le faasifoga i lo tatou Atua auā o lona alofa ua matalupe ai le asō ma
o lea ua faailo le malama mai lagī, ua tatou tafesilafa’i i ona manuia. E faafetaia ai
lau susuga le taitai ole sauniga mo le upu faalaeiau e taiala lo tatou faamoemoe I
lenei Taeao. Ia faapena ona faamanuia atu pea le Atua I lou valaauina.
O lenei taeao ma lo tou afifio mai, e muai faatulou atu i le paia ma le mamalu o le
tatou mafutaga ma ua ou le asā le vaofilifili i mea ane ua fenumiai le uto ma le
maene ona maimau ai lea o i’a o le upega. Ae faafetai le tali leleia o le faatalauula

atu a le tatou Matagaluega, tatou te patipatia le faamanatuga o le ‘Aso Faapitoa o
Meatotino o le Lalolagi i lenei Tausaga, 2024’.
Na uluai avea Samoa ma sui o le Faalapotopotoga o Meatotino Tau le Atamai a le
Lalolagi (World Intellectual Property Organization, WIPO) i le tausaga e 1997.
Ae O lenei aso faapitoa na uluai faamamaluina i le tausaga e 2000, ma e
faamanatuina i le aso 26 o Aperila i tausaga taitasi. O le faamoemoe autu ia unaia
le faalauiloaina o le taua o vaega eseese o Mataupu Tau le Atamai (Intellectual
Property) i le gaosiga o oloa ma auaunaga e tauala mai i o tatou tomai faapitoa,mo
le atinaega o pisinisi aemaise le faamaitega o ni pisinisi fou e siitia ai le tamaoaiga.
O le autu o tapenaga i lenei tausaga o le ‘mataituina lea o le aoga o meatotino tau
le atamai, mo se lumanai manuia e gafataulimaina . O lenei la tausaga ua fuafua ai
le tatou matagaluega e siitia le faagasologa o lenei auaunaga aemaise ai le
faatinoga o ni polokalame faaauau e aofia ai le atunuu atoa. Oloo galulue le Vaega
o Lesitala o Kamupani ma Meatotino Tau le Atamai ma nisi o faipisinisi
taitoatasi,faalapotopotoga ma ni sosaiete, ile faaleleia o agavaa ma tomai e tapue
ai le faatinoga olea ituaiga atamai. Ole luitau autu, o le kopi lea e se fai oloa le
atamai faamaite a le isi fai oloa I lana taumafaiga e faatulaga ese lana oloa poo le
auaunaga ina ia siitia ai lona tamaoaiga. Ose faataitaiga taatele ile tatou atunuu ole
faaaogaina lea ole mamanu o ie lavalava na kopi mai le isi. Ole a avea polokalame
nei a le Matagaluega e fesoasoani foaia ai nei luitau atoa ai ma le lagolago ale
Matagaluega ile faaaogaina ole tulafono e puipuia ai faioloa mai i faiga faaalatua.
Ole naunautiga o le Matagaluega ia siitia lana auaaunaga ile mataituga o ni faiga
faa solitulafono ma le faatinoga o poloklame faalauiloa ina ia malamalama ai le
mamalu ole atunuu oloo gafa ma le faafoeina o nei atinae taua.
Oute manatu ole tatou faatasiga I lenei Taeao oloo faaauau mai ile aso ananafi ua
maua ai le avanoa e faasoa ai fingalo ma le Matagaluega i auala eseese e mafai ai
ona faaleleia atili auaunaga mo le atinae o sosaiete, faalapotopotoga ma pisinisi
laiti e tauala atu i Mataupu Tau i Meatotino Tau le Atamai (Intellectual Property).
O se tasi nei o taleni oloo faatuatuana’i lona atinaega ma oloo faatulaga ile pito I
lalo o atina’e taua. Ole pine olea mau ole to’a gaogao o I latou oloo tauavega nei

taleni ona e foliga mai e tuu lava ile sogasoga ole tagata ia e taumafai lana pito laau.
Ose faataitaiga ua lau silafia I Samoa, ole faaaogaina ole taleni ole pese poo le tusi
ata e maua ai le tamaoaiga ma ua faailogaina ose mea totino a le na faamaitea le
atina’e e auala mai lana taleni poo lona atamai.
Ole tele ia o avanoa e faaleleia ai lenei atina’e ma e ui ina toagaogao I latou ua latou
faaaogaina lea atamai ae ua lauiloa ai Samoa ile lalolagi ona ole sogasoga o nei
tamalii ma tamaitai ile faaaogaina o latou taleni. O nisi o nei tamalii ua lauiloa ai
Samoa ia latou taleni, e aofia ai le susuga a Paulo Suluape ile taleni ole ta tatau,
Faanana Jerome Grey ma Lale Peteru ile fatu pese, Makulata Taua ile mamanu o le
siapo, Leota Lene ile siva afi, Petelo ma Sumeo ile fai faleaitu ma le anoano o isi
tamaitai ma tamalii oloo fai sao ile atinaega ole tele o taleni e siitia ai le tamaoaiga.
Oute manatu e tatau ona toe unaia atili taleni faapenei ina ia faalautele ai le avanoa
ma o le galuega ole a tapena iai le matagaluega ile lumana’I ona o se tasi foi lenei o
manu lauti a le tatou Malo ole unaia lea o atina’e faamaite ile vaega o agafesootai
e siitia ai le tamaoaiga. Faasoa mai o tou finagalo e fesoasoani ai ile Matagaluega
ile fausaga male faatinoga o polokalame talafeagai ma ni fesoasoani e lagolago ai
lenei faamoemoe.
Faamaea atu ai se faamatalaga faapea. Ua saunia e le Matagaluega ni faailoga
faapitoa e faailoa ai le taumafaiga a nisi taitoatasi poo sosaiete oloo gafa male
faatinoga o nei atina’e. Ma ole a faia lea sauniga ise taimi ole aso. E faamalo atu ia
I latou mo la outou taumafaiga ona e le faigofie le faatinoga aemaise ai le tele o
luitau oloo feagai ma lenei ituaiga atina’e. Malo le fai ole faiva, malo le toaga ia
faamanuia atu le Atua ia tupu ma ola a outo atina’e.
Ia agalelei mai le Atua i le tatou polokalame auā ua na’o Ia lava ua ai le poto lilo ma
le mafai e faaatoaina ai se taumafaiga e le gata mo outou le aufai pisinisi ae faapea
foi le lagolago a le tatou Matagaluega.
Ia manuia tele le Aso Faapitoa o Meatotino Tau le Atamai o le Lalolagi i lenei tausaga
ma fuafuaga i lenei aso.