Faatalofa ma faafeiloai atu ile mamalu ua aofaga potopoto i lenei taeao.
Faamoemoega o le Malo: O se tasi manulauti taua oloo ave i ai le faamuamua a le
Malo o Samoa, o le sailia lea o avanoa faigaluega mo ona tagata e le gata i avanoa i
totonu o Samoa nei, ae faapena foi i avanoa i atunuu i fafo e ala i galuega
faavaitaimi.
Ua silia ma le 10 tausaga talu ona amatalia le faiga paaga a Samoa, Ausetalia ma
Niu Sila i galuega faavaitaimi (RSE 2007 & SWP 2012). O loo faaauau pea
feutanaiga ma ia atunuu ina ia maua pea avanoa faigaluega i Galuega faavaitaimi
mo Samoa, e ui i tulaga maaleale o iai nei le lalolagi ona o aafiaga o le Koviti19.

E le gata i lea o le naunautaiga ina ia tatou maua pea nei avanoa, lea foi oloo finau
mai i ai isi atunuu o lenei itulagi (Fiti, Papua Niu Guinea, Solomona, Tonga,
Vanuatu, Kiribati ma isi).
Mo le silafia, e le gata foi i avanoa faigaluega i faatoaga mo taimi pupu’u (6 – 7
masina), ae o lea foi ua maua avanoa e faigaluega ai o tatou tagata tomai faapitoa i
galuega fasimanu mo le sili atu i le tausaga le umi. Ua amata foi ona maua nai
avanoa I galuega faa-kamuta, fale talimalo (hospitality) ma galuega i le tausiga o
tagata matutua (Age care).

Fautuaga a le Malo: O le auga o lenei aso o le tuuina atu lea o se fautuaga a le
Malo mo lo tou sauni I Ausetalia. E le mafai ona tuua le matafaioi a le Malo o le
faufautua ma apoapoai atu ia te outou o avefua a lo tatou atunu’u lea ua
faamanuiaina i nei polokalame o galuega faavaitaimi. E iai nisi o outou na o
muamua i galuega nei, o nisi foi o le taimi muamua lenei, ae o le faamoemoe lava
mo le manuia ma le maua pea o avanoa o le galue ma le faamaoni.
E taua le avea o outou ma avefua, aua a lelei a outou galuega faatino ona manuia
atoa lea o le atunuu, ae a faaletonu foi ona tauvalea uma ai lea o Samoa, aemaise le
aafia ai o le toe maua o avanoa mo isi tagata, faapea lou nuu.
Aafiaga o le Koviti 19 i avanoa faigaluega: O se tausaga ese lenei i a outou
tapenaga mo le toe masi’i atu i Ausetalia mo le amatalia o galuega faavaitaimi.
Toatele nisi ua le mafai ona malaga atu i lenei tausaga ona o le faaitiitia o avanoa
ua faamatuu mai e le Malo o Ausetalia mo lenei tausaga ona o aafiaga o le faama’i
o le Koviti19.
Mo lo outou silafia, o loo taumafai pea ina ia maua mai avanoa faaopoopo, ma o
outou lea ua amata mea mo Ausetalia. E faafetaia ai le Malo o Ausetalia, faapea
Kamupani i Ausetalia ona o le faatuatuaga i o tatou tagata.
Aiaiga o le Faanofoesea i Ausetalia Talu ona pipisi le faamai o le Koviti, ua
faateleina ai foi ma nisi o aiaiga e ao ona mulimulitaia e outou pe afai e toai taunuu
i Ausetalia. E taua le usitaia o ia aiaiga uma, ma ia mataitu vaega uma e ao ona
lagolago iai. Aua o le taimi lava e solia ai tulafono ao faanofoesea ai i Ausetalia ua
e soli vavao, e taofia ma molia ai loa oe e leoleo pe a e soli vavao ma faatali ai le

taimi e iai se vaalele e toe sau ai i Samoa ae le’i amataina galuega na mafua ai ona
e faimalaga atu.
Faamanuiaga o Avanoa: E faamanatu atu ina ia faaoga lelei nei avanoa ua maua,
aua oloo fia maua foi e isi tagata.
O avanoa foi oloo maua mai ai faamanuiaga e tele mo le atinae o aiga ma nuu. E le
gata e tausi ma atinae ai le aiga, ae faaaooga ai foi fanau. O lou faatamala lava o le
a le taunuu ai ise taunuuga lelei.
Lagolagosua: Faafetai atu i nai o outou aiga, faapea foi pulega mamalu a alii ma
faipule, ekalesia ma paaga uma mo le lagolago ma le fesoasoani i tapenaga uma ina
ia taunuu lo outou faamoemoe.

Luitau ma Faafitauli: E ui i le tulaga maualuga o le taumafaiga a Samoa e ala ia
outou galuega faatino i galuega faavaitaimi i tausaga ua tuanai, ae sa iai lava foi
faafitauli ma luitau e ao ona tou nofo uta lelei i iai, ma ua aafia ai foi avanoa mo
Samoa.
O nisi nei o vaega ua ou manatu e ao ona apoapoai atu ai ia te outou ao lei tuuvaa
atu mo Ausetalia;
1. Taumafa ava malosi & fualaau faasaina: Ua avea le ava malosi ma se tasi
o faapogai o le tele o faafitauli i le iai i galuega faavaitaimi. E faaletonu ai au
gaioiga ma faaiuga e fai, e tupu ai feeseeseaiga ma aafia ai le va nonofo lelei
o tagata faigaluega, faaletonu ai ma le faatinoga o galuega ma iu ai lava ina
toe faafoi mai i Samoa nei. E le faatagaina le taumafa ava malosi ao iai i
galuega faavaitaimi.
2. Mulilua: Tasi lenei faamai ua tupu tele. Manatua ma le alofa lou toalua ma
lau fanau oloo tapuai atu. E le tuu avanoa le Malo ia i latou e solia lea
tulafono taua a le Atua. A faamaonia loa e te le toe malaga i galuega
faavaitaimi.
3. Faamaoni i le faatinoina o galuega: Ua tele tupe a fale faigaluega o le a
outou galulue ai ua faaalu i nofoaga o le a tou faanofoesea ai, e ao foi la ona

outou manatua le agalelei ma le agaalofa o nei kamupani mo outou, ma ia
galulue malosi ae aua le faalogologo tiga.
E le gata i lea o totogi lelei (AUD$19.84; & $24.86 per hour) oloo tou maua
mai nei galuega ina ia teu lelei mo se faasiliga, e ese mai ma tupe oloo lafo
mai e tausi ai aiga i Samoa nei. Ia fuafua tatau aua a tele foi le soona lafo
mai i Samoa nei i vaiaso uma, o le tele foi lea o le soona faaalu leaoga o lou
afu.
4. Fesootaiga ma Aiga oloo i Ausetalia: E iai taimi oloo fesootai ane ai tou
aiga i Ausetalia ia te outou. O le fautuaga ina ia tou usitaia tulafono a fale
faigaluega aua o latou e ona ina galuega oloo tou galulue ai.
A iai ni faafitauli e manaomia ai se fesoasoani faafesootai le Ofisa Sooupu a
Samoa (Susuga Aufai Fulisia) lena o le a tou feutagai i le tele o taimi.
5. Manaoga o outou aiga mai Samoa nei: e 4 vaiaso e le tatau ona fesootai
atu ai outou aiga mo se tupe, ona e 2 vaiaso e faanofoesea ai e le mafai ona o
ini faletupe pe o ese ma ia nofoaga, atoa ai ma le isi 2 vaiaso e faatoa amata
lelei ai galuega. Lona uiga e faatoa mafai ona lafo mai se tupe poo le 5 o
vaiaso talu ona outou taunuu i Ausetalia.
E fautuaina aiga oloo tapuai atu i Samoa nei ina ia lava le onosai.
Isi Faamanatu:
6. Faaeteete i uiga o tagata i na atunuu, aemaise i tamaitai e ona faaseseina ai
outou.
7. A o foi e fai faatauga ma tafafao, ia faaeteete ma mataala i luga o ala tetele
ona o le saoasaoga o feoaiga i na atunuu, pe a faatusa ia Samoa nei.
8. Faaeteete i le faaoga sese o tou telefoni, ma alu vale ai le taimi i le po ma ua
le lava ai foi ma le malologa, ma vaivai ai i le aso e sosoo ai ona aafia ai lea
o galuega.
Faaiu atu ai sau fautuaga e faapea, toaga e tatalo e le aunoa e maua ai musumusuga
lelei i taimi uma; ma fai tou faigalotu i taeao ma afiafi . Ma usiusitai i tulafono o

galuega ao tou iai i Aiusetalia. Tautuana foi le tausia lelei o lo outou saogalemu ma
le soifua maloloina.
Manuia la outou faigamalaga i aao alofa o le Atua.
Soifua