Ua maualuga le viiga o le Atua i lenei aso ua faamanatuina ai le tolusefulu (30)
tausaga o le auaunaga a le Faalapotopotoga o Fale o Samoa mo le atunuu.
Tatou te patipatia ai le alofa o le Atua ona o galuega ma matati’a ua ausia ma
matimati ai le tautua mo nei ma a taeao.

O le mea moni e tāua lenei fuafuaga ma le vaai mamao a le Mālō i le faatuina o
le Faalapotopotoga o Fale o Samoa i le 1990. O le manulautī, Ia siitia le soifua
manuia o tagata e ala i le faaleleia o maota ma apitaga ia anagatā ma mamā, e
faatino i nonogatupe i ni tuutuuga talafeagai.

Na faatuina le Faalapotopotoga o Fale i le 1990 fetaui ma le faaleleia o apitaga o
le atunuu na faaleagaina i afā o ‘Ofa ma Valelia. E $10 miliona tala le tupe faavae
a le Mālō.

 E o’o mai i le tausaga 2020, ua fanau mai lea tupe faavae e $10 miliona tala,
se aofai o le paleni o nonogatupe e tusa ma le $65 miliona tala i le 4,000 o
nonogatupe e o’o mai i le faaiuga o Novema 2020.

 O Me 2005 – Na umia ai le Ofisa Autu faatau motu i le nofoaga o i ai nei i
le ogatotonu o le taulaga o Apia, fetaui lelei ma le afea gofie e i latou e
mo’omia le fesoasoani.

 I le 2007 – Na faatuina ai le Ofisa i Salelologa i Savaii mo le faafaigofieina
o lenei tautua mo le motu tele i Salafai.

 2012 – Sa tele le fesoasoani i nonogatupe e sili atu i le $8 miliona tala, na
faaleleia ai maota ma laoa o le atunuu, na faaleagaina i lologa ma matagi
malolosi i le āfā o Eveni.

 Iulai 2013 – Na manatu ai le Kapeneta e tuuina mai fale nofo (rental housing)
e 72, i le Faalapotopotoga o Fale e pulea ma faafoeina i se tulaga faapisinisi,
ma toe faaopoopo mai ma isi fale tetele ina ia faafoe lelei nei aseta tāua a le
Mālō. O le value o ia fale e $3 miliona tala.

I le taimi nei ua mae’a ona faaleleia ia fale nofo, ma ua i se tulaga maualuga
i le tau atoa e $5.5 miliona tala le value. Ua nofoia uma nei fale ma ua aoina
mai se aofai e $600,000 i le tausaga, e tau leai se tupe pa’ū po’o rental arrears
ona ua fa’apisinisi ona fa’afoe le fa’aāogaina o fale.

 2015-2018 – Sa fai pa’aga ai ma le Habitat for Humanity (Niu Sila) ma le
ADRA ma ofoina atu nonogatupe mo ē vaivai tamaoaiga, i aiaiga māmā e
tusa lona aofai ma le $4 miliona tala mo aiga e 500.

 I le faama’i o le Koviti19 ma le fesoasoani i paaga (clients) a le
Faalapotopotoga o Fale, e $2 miliona tala lona aofai o fesoasoani e auala i
tului māmā, faapea le faapafala o le totogiina o nonogatupe mo ni nai
masina.

 E $20 miliona tala nonogatupe e taliaina mo le 900 i le 1,000 tagata talosaga
i tausaga taitasi. O se auaunaga moomia tele le faaleleia o fale nofo, ma le
faatauina o fanua umia saoloto, mo le fausia o apitaga o le mamalu o le
atunuu.

 Sa toe iloiloina le Tulafono Faavae 1990, i le 2010 e faalautele ma faaleleia
le auaunaga e ala i le tatalaina o nisi avanoa talafeagai mo le lelei lautele o
tagatanuu o Samoa.

Ua toe iloilo ma faatulaga lelei foi le tulafono autu i le 2020 ina ia aafia ai
fale nofo (rental) le isi matafaioi faaopoopo a le Faalapotopotoga.

 E tele foi ni faailoga po’o awards mai i Faalapotopotoga Faaunetupe o Asia
ma le Pasefika faapea le PSC a Samoa na tuuina mai mo le Faalapotopotoga
o Fale ona o lana tautua mo le atunuu.

 E tele ni matati’a ua siitia ai le auaunaga a le Faalapotopotoga o Fale aemaise
le toatele o le mamalu o le atunuu ua manuia ma siitia ai le tamaoaiga. O
loo tele pea nisi fuafuaga taua aua le atinaeina o lenei tautua, mo nei, ma a
taeao.

 E leai lava se faiva e ‘asa ma le maumau, peitai o lo’o faasili pea le auaunaga
ina ia fai ma fatu e fua mai i pulega lelei ma amiotonu (good governance) i
le faatinoina o le tautua.

 E momoli atu ai le agaga faafetai i le Taitaifono ma le Komiti Faatonu,
Pulega ma le Aufaigaluega ona o la outou tautua punoua’i.
Faafetai foi i le tele o paaga a le Faalapotopotoga, o tagata sulufa’i mo nei
ituaiga fesoasoani aemaise le ‘au fai tatalo o lo’o nōnō manū auā se manuia
o Samoa mo a taeao.

Faamanuia le Atua i o outou faiva.

Soifua ma ia manuia.