O le mautinoa ia saogālēmū, malutia ma sologa manuia femalagā’iga a
Sui Usufono uma o le Fonotaga a Ta’ita’i o Mālō o le Taupulega, fa’apea le aufaigaluega galulue o lo’o
ofoina atu le galuega fesoasoani mo le Fonotaga, aemaise i latou o lo’o afifio ma pāpā’ā’ao i lea vaega o
Upolu, o le afuaga lea o le fuafuaga ua fa’ata’oto mo taimi fa’atulagaina, e tapunia lē tumau ai nisi o
vaega o le auala tele i le taulaga o Apia ua fa’aigoaina o le Samoa CHOGM 2024 Peninsula.
O le agaga mauāluga, ina ia to’a fīlēmū ma sologa lelei femalagā’iga a Sui Usufono i le CHOGM
Peninsula i le taimi o le Fonotaga e aunoa ma ni fa’alavelave e ono tutupu mai, po’o le poloka fo’i o le
auala tele.
E amata atu i lenei vaiaso i le Aso 14 i le Aso 28 Oketopa 2024, o le ā tapunia lē tumau ai le nofoaga
fa’atali pasi i Savalalo, ma o le ā fa’aāoga tasi le nofoaga fa’atali pasi i Fugalei mo femalagā’iga a le
mamalu o le atunu’u lautele mo pasi la’u pasese.
Ua mae’a fa’atulaga fo’i taimi o le ā tapunia lē tumau ai le auala tele i le vaega tonu ua fa’aigoaina o le
CHOGM Peninsula i le Aso Tofi, 24 Oketopa 2024, Aso Faraile, 25 Oketopa 2024 ma le Aso To’ana’i,
26 Oketopa 2024, i le fa’amoemoe ia faigofie ma ‘aua ne’i i ai se poloka i le mamalu o Sui Usufono o le ā
femalagāa’i mai lea nofoaga i lea nofoaga mo Fonotaga, fa’apea ai ma Faletalimālō o lo’o api ai e pei ona
aiaia i le Polokalame Fa’apitoa o le CHOGM.
I le CHOGM Peninsula, e amata mai i le Faletalimālō o le Taumeasina i Moata’a se’ia pa’ia le Magatolu
Fa’ata’amilo (Roundabout) i Vaisigano, e aofia ai ma Matāutu ma fa’asolo atu ai i le talafātai o Apia se’ia
pa’ia le Ā’oga Fa’aSeila a le Iunivesite Aoao o Samoa i Mulinu’u.
Mo le fa’afaigofieina ona mata’itūina, ma nofo malamalama ai le mamalu lautele o le atunu’u i nofoaga o
le ā poloka lē tumau, o le ala lea ua fa’atulaga ma vaevaeina ai i Sone nei;
 Sone A: Amata mai le Faletalimālō a le Taumeasina aga’i mai le magafā o le auala tele i Matāutu.
 Sone B: Magafā i Matāutu aga’i mai i le Magatolu Fa’ata’amilo [Roundabout] i Vaisigano.
 Sone C: Magatolu Fa’ata’amilo [Roundabout] i Vaisigano aga’i atu i le Ofisa Autū o le
Matāgaluega o Leoleo, Falepuipui ma le Ola Toe Fuatā’ina i le Magāala [Street] o le Ifiifi.
 Sone D: Mai le Ofisa Autū o le Matāgaluega o Leoleo, Falepuipui ma le Ola Toe Fuatā’ina i le
Magāala o le Ifiifi se’ia o’o atu i le magatolu o lo’o i ai le Faletupe o le ANZ ma le Falemeli a
Samoa.

 Sone E: Mai le magatolu o lo’o i ai le Faletupe o le ANZ ma le Falemeli a Samoa i le magatolu i
le talafātai o Apia o lo’o i ai le Ofisa o le Asco Motors.
 Sone F: Mai le magatolu i le Asco Motors, aga’i atu i le Ā’oga Fa’aSeila a le Iunivesite Aoao o
Samoa i Mulinu’u.
I taimi fa’atulagaina mo le polokaina o ia vaega o le auala tele, e na’o ta’avale e i ai pepa fa’amaonia e
mafai ona fa’atagaina. Mo le aga’i atu i nofoaga o le ā usuia ai le Fonotaga ma le malaga ‘ese mai e uia ai
le auala o le ā tapunia lē tumau, e na’o ‘āiga, pisinisi ma fa’alapotopotoga ua i ai pepa fa’amaonia mo ā
latou ta’avale e fa’atagaina.
Taimi e tapunia lē tumau ai auala:
Aso Gafua, 14 Oketopa 2024 – Aso Gafua 28 Oketopa 2024,
Nofoaga Fa’atali Pasi i Savalalo TAPUNIA ATOA – Mai le Aso Gafua, 14 Oketopa 2024 i le Aso
Gafua, 28 Oketopa 2024, o auaunaga tau pasi la’u pasese uma o le ā fa’aāogaina le Nofoaga Fa’atali Pasi
i Fugalei.
Aso Tofi, 24 Oketopa 2024.
 Mai le 12.00pm i le aoauli i le 4.30pm i le afiafi — Sone C ma le Sone D
 Mai le 5.00pm i le afiafi i le 10.00pm i le po— Sone A (Fa’asilasilaga: I le talafātai o Apia i le
Itu i Sasa’e aga’i atu i le Auala Tele i Vaivase–Tai kolosi ane ai i Moata’a o le ā galulue ai fo’i
Leoleo mo le mata’itūina o le mamalu femalagāa’i o le atunu’u aemaise o le au Usufono i lea
taimi).
Aso Faraile, 25 Oketopa 2024.
 Mai le 9.00am i le taeao i le 11.00am i le taeao —Sone A, B ma le F
 Mai le 12.00pm i le aoauli i le 2.30pm i le aoauli —Tapunia uma ai Sone A, B, C, D, E ma le F
 Mai le 5.00pm i le afiafi i le 7.00pm i le afiafi — Tapunia uma Sone A, B, C, D, E ma le F
Aso To’ana’i, 26 Oketopa 2024.
 Mai le 8.00am i le taeao i le 9.30am i le taeao — Sone A, B ma le C
 Mai le 6.00pm i le afiafi i le 8.00pm i le afiafi — Sone A, B ma le C
E toe logo vave atu lava lo outou mamalu, pe ā i ai nisi fesuiā’iga i taimi ua fa’atulagaina e tapunia ai
vaega o le auala tele i le nofoaga tonu ua fa’aigoaina o le CHOGM Peninsula.

Matou te fa’afetaia ma le agaga fiafia la outou lagolagosua malosi ma le fesoasoani, e opogi fa’atasi lo
tatou fa’amoemoe ina ia mautinoa e malutia, saogālēmū ma a’e ma le manuia lā tatou taligāmālō mo le
Fonotaga Tele a Ta’ita’i o Mālō o le Taupulega [CHOGM Samoa 2024].