Ua mae’a ona momoli la’au i Foga’a e le Ta’ita’i o le Sauniga, lau susuga Rev. Alofa
Alo, ona o le Alofa faasoa mai o lo tatou Matai Sili, ua taunu’u ai le faamoemoe i le
asō. Talitonu sa tau ilo lenei taeao pe tua ma ni ā, aūa e lē taumasina o tatou mana’o
ma le finagalo o le Atua. Peitai o lo’o tali mai pea le Atua e ala i lona agalelei i a
tatou fuafuaga fai.
O le a ta’aalii i fanua le inafo a Tuaau i paia eseese ua lalago faatasi i lenei taeao, le
Afifio o le To'aono o Alii o le Faga, Afio le Taulagi Alalata'i le To'afa ma Tagata
Matutua faapea le Falea'ana ma le Salemuliaga.
Ua afifio foi paia faasino i Minisita o le Kapeneta, Fofoga Fetalai ma Minisita
Lagolago faapea Sui Faipule o le Palemene, tainane Faauluuluga o Matagaluega ma
Faalapotopotoga Tumaoti a le Malo, ma Sui o le Kamupani sa feagai ma lenei
galuega, ma le mamalu eseese o le au valaaulia.
O paia ma mamalu na ua taualoa ai le faamoemoe e pei ona tatou i ai i lenei taeao.
TALA O LE GALUEGA
Ina ua mae’a tauofoga faalaua’itele a le Malō, ma manumalo ai le ofo pito i maualalo
a le FICO Construction Ltd i le tau e $321,949.58 ma o latou faatinoina ai loa le
fausiaina o lenei auala. O lenei tau aofai sa faatino uma ai e le FICO le auala lenei ma
le auala o Salimu lea fato'a maea ona tatalaina.
O le umi atoa o le auala lenei a Luua e 1.2 kilomita, 7 mita le lautele aofia ai ma
alavai, 5 mita le lautele ua faataina.
E iai tupe sa mafai ona faasaoina mai lenei galuega, lea sa toe sosoo atu ai le auala i
uta ona o le talosaga a Alii ma Faipule o le tou Afioaga nei. E leai foi se tuaoi o mea
lelei pe a silasila atu le Malo e talafeagai ona faatino lea vaega mo nuu uma o loo
fausia a latou auala.
UPU FAALAUAITELE
O le tasi nei o auala ua tatala aloaia i le asō ma e leai lava se isi lagona e sili atu i le
lagona o le fiafia ma le faafetai ona o le toia pea o tatou i le tamaoaiga foai mai o le
Atua.
O soo se galuega ua maea ona fausia e aofia ai ma lenei auala ua tatala i le asō, e le
faalogologo tiga ai le Malo i le faataunuuina o ia tiute aua o galuega sa tapuaia e le
pule mamalu a Alii ma Faipule faapea Faafeagaiga taulagi a Afioaga.
Afai la ua mapu ē o le a fa’aaogaina lenei auala mai faafitauili sa asaina mai i aso ua
alu, o le sini tonu lea o lo’o tulimatagau e le Malo e ala i lenei polokalame.
Ua mae’a la le pitolaau a le Malo sa faamatuu mai ai le fesoasoani ona e faamuamua
pea le soifua manuia o tagata. A o se avanoa lelei la lenei e faatino ai loa a outou
fuafuaga tau atia'e sa faavaa tuia ona o le auala.
E i ai le faamoemoe o le isi lenei auala o le a tele sona sao i le tamaoaiga o le Afioaga,
a tumau pea le lagolago i atina’e ma galuega faatino a lo tatou Malo, e toe sosoo foi lo
tou auala.
UPU FAAI’U
E momoli atu le faafetai ma le faamalo i le pule faamalumalu a lo tou afioaga a o
faagasolo le galuega i le fausiaina o lo outou auala.
Faafetai atu foi i le Kamupani a le FICO Construction Ltd mo le faatinoina o le
galuega i fua faainisinia ma aiaiga sa fuafuaina mo le fausiaina.
Faafetaia foi le Pulega o Felauaiga i le Laueleele mo le faatonutonuina ma le vaaia
lelei o galuega a'o faatino lenei galuega.
Faamoemoe pea i le mana o le Alii e tali mai ia tatou talosaga mo fuafuaga uma.
Ia auomanū lenei aso i le alofa o le Atua pulepule tetele.
Soifua.