Ua faafofoga le Atua i le tatou Talosaga i lenei taeao, e pei ona tapena ma
taitaiina ai tatou e le susuga i le faaafeagaiga ia Niulala Kupa. Talitonu la le taofi
o lea ua togi pa tau i le ‘ave, aua sa tau ilo lenei taeao pe tua ma ni ā. Peitai, o
lea ua tau mai vaa na tiu i vaa na tau, ia a o lo o mamau pea lago o le vaa na fao
aofolau, i le agalelei faifaipea o lo tatou Matai sili I le Lagi. Faafetai.
O le a taoto ia ao se ala e o’o sa ma faiga o le taeao ma le aso, Tulouna Oe le
Toiloto, Taufaasisina ma Alala-Matuatala, Afifio Muagututia ma Tofa, Susu mai
Nonu ma Sa’u, faapea Galu ma le ‘Au Tapaau, Tulouna Oe Salafaitele ma lau
Fetalaiga Poulava.
Ua afifio foi paia faa le malo, le Kapeneta ma sui mamalu o le Palemene, tainane
Faauluuluga o Matagaluega ma Faalapotopotoga Tumaoti a le Malo, ma Sui o le
Kamupani sa feagai ma lenei galuega, faapea le mamalu maualuga o tupu ma
e’e, faapea Samoa ua potopoto.
Malo le soifua, malo foi le Lagi Mama.
TALA O LE GALUEGA

O lenei auala e le o se auala fou, peitai sa talosagaina e le mamalu o Alii ma
Faipule o le afioaga nei, taualamai sui Faipule e toe fia faaleleia nisi o vaega o le
auala ona ua faaleagaina ma ua faigata ai femalagaina. Na talia e le malo le
talosaga ma faagasolo ai loa tauofoga faalaua’itele masani a le Malo. Na
manumalo ai le Kamupani a le FICO Construction i le tau e $679,380.90 ma o
latou faatinoina ai loa le toe faaleleia o lenei auala.
 Umi atoa o le auala e – 5 kilomita
 Lautele o le auala – 5 mita
 Lautele Faataina – 4 mita
E ui ina lauto’ia i tatou I le faamai o le Koviti, ae le mafai ai lava ona taofia
galuega faa’auau a le tatou malo i soo se auala e faafaigofie ai femalagaina i
luga o auala tetele.
Ua mae’a le pitolaau a le Malo na faamatuu mai ai le fesoasoani ona e
faamuamua pea le soifua manuia o ona tagata. O le naunauta’iga o le Malo, ia
faafaigofie ona o’o atu taavale i vaega o lo o galulue ma nonofo ai le mamalu o le
atunuu, faapea fanau i aoga ma isi auaunaga moomia. O le a tuu atu lenei auala
ma le talitonuga o le a faaaogaina ma le tatau ae maise o le saogalemu.
UPU FAAI’U
E momoli atu le faafetai ma le faamalo i le pule faamalumalu a Alii ma Faipule o
le afioaga nei, a’o faagasolo le galuega i le fausiaina o lenei auala.
Faafetai atu foi i le Kamupani a le FICO Construction mo le faatinoina o lenei
galuega tele i fua faainisinia ma aiaiga sa fuafuaina mo le fausiaina.
Momoli foi le faafetai i le Minisita o Galuega ma Atina’e Tetele, Komiti Faatonu
ma le Pulega o Fealauaiga i le Laueleele (LTA) mo le vaaia ma mata-i-tu lelei o
galuega a’o fausia i ona vaega uma i aiaiga ma fua faainisinia.
Faamoemoe pea i le mana o le Alii e tali mai ia tatou talosaga mo fuafuaga uma.
Ia auomanū lenei aso i le faatasi mai o le Atua pulepule tetele.

Soifua.