Ua motu nei i liu le atu mua a le tautai matapalapala, e pei ona mua’i fana
ai le ū i le vateatea e lau susuga i le ta’ita’i o le sauniga aua lo tatou va
tapuia ma le Atua. Ia faaoloaina lau susuga e le Agaga o le Atua, auā le
folafolaina o lona finagalo.

 O lenei aso ma le faamoemoe, ua afifio mai le aufaigaluega pa’ia a le
Atua, afioga i Minisita ma Sui o le Palemene, Faauluuluga o Matagaluega
ma Faalapotopotoga Tumaoti faapea le au valaaulia o matua ma fanau,

MALO O SAMOA

MATĀGALUEGA O A’OGA, TA’ALOGA MA AGANU’U

2

sei o tatou patipatia le galuega matagofie, o se atina’e fou ua tatala aloaia
i le asō, o le Aoga Amata ma le Aoga Tulagalua i Tafaigata. Ua Faaaoga
ai fale o le falepuipui tuai e faavae ai le Aoga Tulaga Lua fou mo fanau a
latou nei ua nofoia eleele fou nei i Tafaigata. Ma faasaoina ai ma tupe i
le tau Malaga mamao i Apia i le Taulaga o fanau ma matua. A lea ua iai
le Aoga i outou lava autafa fale.

 Fai mai upu a le au tulatoa, a faalele fulu measina ma auafa memea a le
atunuu, ona faapea lea o le alaga, saō faalalelei, ua malie o malie mālō.
Ae ua le ‘ole lea, tatou ‘ae’ae lea manu ua ulu. E faapena se lagona i
lenei uluai taimi ua ausia ai se matāti’a faapea, ua taunuu ai i le asō le
miti a lo tatou mālō, aua ua faama’ite e le Matagaluega o Aoga Taaloga
ma Aganuu le faavaeina o le a’oga fou mo a tatou nuu a uta nei, i
Tafaigata, Nuu, Falelauniu, Siusega ma isi nuu tu lata mai ina ia faigofie
ona maua e tou fanau avanoa tutusa i aoaoga. O le tapenaina o lenei
faamoemoe e lei silia ma le 3 vaiaso, ona o le manatu ia a’e faatasi ai ma
isi aoga i le Kuata 3 o le tausaga nei.

 Ua ese foi lagona o lenei lotoa ua iai. Ua le o toe nofoaga o le sala ma le
faalumaina a ua avea o se nofoaga o le saili malo ma le faaeaina. Le
Matagaluega o Aoga ua faamalo le fai o le faiva. Malo le tofā fetala’i,
faafetai i lo outou manatu i fanau nei o le lumanai manuia o Samoa.

3

 O se miti ua taunuu, le fausia o se aoga e pei ona iai lenei aoga, ona o se
aoga muamua lea faataitai (model school) ua mafai ai ona tuu-faatasia ai
le Early Childhood Education (ECE), aoga Tulagalua faapea se Kolisi i se
taimi oi luma. Le mamalu o lenei aofia ole’ā taunuu iinei le miti a le Ofisa
Sili o pulega ia mua i malae le laumua nei i Tafaigata i aoaoga e faaaogā
ai auala faatekonolosi faaonoponei (digital education). E amata mai lava i
le ECE seia oo i vasega Tulagalua mo le aoaoina o mataupu ‘ese’ese.

 I le lumanai ole’ā faapea foi ona faatu ai se Kolisi ma avea ai ni isi o potu
tuai o le falepuipui olo’o iai i le taimi nei e toe faafou uma, e fai ai mataupu
faa-matata eseese (vocational subjects) faapea le aoaoina o mataupu
eseese poo learning pathways e pei ona iai mataupu faa-Saienisi, faa
Sue-tusi (commerce), faapea mataupu tau faatufugaga (arts). E iai foi ni
fuafuaga mamao ole’ā faaogaina lenei lotoa e le Matagaluega e teu mau
ai faamaumauga (archives) ona o le mausalī ma le malolosi o faavae o
fale tuai olo’o iai pea.

 O le aofai o fanau ua maea ona faaulufaleina i lenei aoga e 341 (69 fanau
aoga laity i le ECE, 272 fanau aoga Tulagalua). E toaono (6) le
aufaigaluega mo le Aoga Tulagalua ma le toalua o faiaoga mo le Aoga
Amata.

4

 O le agaga faafetai i le Ekalesia a Iesu Keriso o le Au Paia i Aso e gata ai
ona o le fesoasoani mai i kesi ma nofoa e 100 ma isi vaega e faaaoga e
le laumua nei. Ia faamanuia le Alii ma toe taui atu lou tou agalelei.

 E le itiiti le faamālō ma le faafetai i le afioga i le Minisita, le Ofisa Sili ma le
pulega faapea le lavaloa o le matagaluega ona o le galuega tele ua
mae’a. Faafetai foi i le Kolisi o Leififi i faiaoga ma le vasega o le autusiata,
ona o taleni pei ona outou vaavaalua ai ma le aufaigaluega a le
mataglauega, ua mata’ina ai ata lanu eseese ua tusia i pa sima oloo
siomia ai le lotoa. Faamālō onosai lea ua tau lau o le faamoemoe, viia le
Alii i lo outou soifua tautua i le atinaeina o lenei aoga aemaise o le alolofa
i fanau a le atunuu.

 Mo fanau uma ole’ā ulufale i lenei laumua, ia aoga lenei atinae fou mo a
outou sailiiliga i le poto salalau aua aiga, nuu, ekalesia ma le mālō. Amuia
alo ma fanau o lenei aoga ua outou tepa i ula tago i ula ona o nei manuia
le aumaua. O le lu’i mo matua ma fanau oloo pāpāa’ao iinei. Aua le
faatamala a ia mataala ua i outou faitotoa manuia, ia talisapai aua nei
melea manū ua maua.

5

 Mo ē foi e leo talia gofie lenei aoga ona o nisi o manatu ma lagona, talu ai
talaaga o fatia ua sola, tau ina ou faapea atu “Tatou faataua le fale – ia
faapena foi le anofale. Ia lelei le amataga – lelei foi le faaiuga.” O le
mafuaaga lena ua faaigoa ai lenei aoga o le St. Paul’s Academy aua
ua fotua’i mai i lenei lotoa ataata o Taulelei o nei ma eluã. O Saulo o
ananafi ua avea nei ma Paulo o le asõ e faaolaina ma aoaoina fanau
ia manuia auā Samoa ma lona lumana’i – mai le aoga lenei ua
faaigoaina o le Aoga a Paulo poo Sagato Paulo. Na ulua’i sauaina le
Ekalesia Kerisiano ae mulia’i tofia e lo tatou Alii Faaola e avea ma
ana ulua’i a’oa’o sili o mataupu silisili(theologian) – o le Talalelei a le
Ekalesia Kerisiano Aoao i le lalolagi.

 A tuuama le fua ma tatala le filialii, ia alofa le Atua ma faalaolao peau o le
ala.

SOIFUA MA IA MANUIA.